Loralai: Youm-e-Shuhada par shaheed Inspector Jandar Shabozai ke ghar taqreeb, Dosarka thana un ke naam se mansoob

Loralai: Youm-e-Shuhada ke mauqe par zila Loralai ki Killi Shabozai mein Balochistan Police ke bahadur saput shaheed Inspector Jandar Shabozai ke ghar aik purwaqar taqreeb munaqid hui, jis mein police hukkam, zilai intezamia, siyasi o mazhabi rehnumaon, qabaili umaidin, samaji shakhsiyaat aur shehriyon ki badi tadad ne shirkat kar ke shuhada ki bemisal qurbaniyon ko khiraj-e-aqeedat pesh kiya.

Taqreeb mein DIG Loralai Range Junaid Ahmed Sheikh, Deputy Commissioner Loralai Haseeb Shuja, SSP Loralai Dr Fahad Ahmed, Jamiat Ulema-e-Islam zila Loralai ke senior naib ameer Mufti Muhammad Ibrahim, naib ameer Maulana Muhammad Asim, naib ameer Maulana Attaullah Shah Bukhari, secretary information Malik Amanullah Nasir, deputy general secretary Maulana Saifullah, deputy general secretary Qari Sanzar Khan Rahmi, Maulana Sadiq Khosti, Malik Dad Muhammad, digital media coordinator Attaullah Kakar aur Syed Muhammad Hotak samet mukhtalif shobaha-e-zindagi ke afraad ne shirkat ki.

Dosarka thana shaheed ke naam se mansoob

Shurka ne kaha ke shaheed Inspector Jandar Shabozai ne Dehshatgardi aur jaraim ke khilaf jaddojehd mein jaan ka nazrana pesh kar ke watan aur awam ke tahaffuz ki roshan misaal qaim ki, aur police ke shuhada poori qaum ka sarmaya hain. Is mauqe par hukumat-e-Balochistan ki janib se Dosarka thane ko shaheed Inspector Jandar Shabozai ke naam se mansoob karne ke faisle ko tareekhi aur qabil-e-tehseen iqdam qarar diya gaya, jis se shaheed ki khidmaat ka aitraf hoga aur aane wali naslon ko watan par qurban hone walon ki yaad taza rahegi.

Taqreeb mein shaheed ke ahl-e-khana se izhar-e-yakjehti kiya gaya aur unhein yaqeen dilaya gaya ke Balochistan Police aur poori qaum apne shuhada aur un ke khandanon ki qurbaniyon ko kabhi faramosh nahin karegi. Shurka ne shuhada ke isal-e-sawab ke liye fatiha khwani aur khusoosi dua bhi ki.

DIG Junaid Ahmed Sheikh ne khitab mein kaha ke Balochistan Police ke jawan Aman o Aman ke liye shab o roz khidmaat anjam de rahe hain aur shuhada ki qurbaniyan force ke liye mash’al-e-raah hain. Unhon ne kaha ke shuhada ki yaad ko zinda rakhna aur un ke ahl-e-khana ki har mumkin mouawanat Balochistan Police ki awwalin zimmedari hai. Deputy Commissioner Haseeb Shuja aur SSP Dr Fahad Ahmed ne bhi azm zahir kiya ke Dehshatgardi aur jaraim ke khilaf jaddojehd poori quwwat se jari rahegi aur shuhada ka mission har soorat aage barhaya jaye ga.

Taqreeb ke ikhtitam par mulk mein aman, istehkam aur khushhali ke liye aur shaheed Inspector Jandar Shabozai samet Balochistan Police aur mulk ke tamam shuhada ke darjaat ki bulandi aur un ke ahl-e-khana ke sabr-e-jameel ke liye khusoosi dua ki gayi.

Tasveer: Bashukriya DG PR Balochistan