Loralai mein Jashn-e-Azadi futsal muqable, mehkama Khel ka naujawanon ko mazeed mawaqe dene ka azm

Loralai: Chief Minister Balochistan Mir Sarfraz Bugti ki khusoosi hidayat ki roshni mein Jashn-e-Azadi Pakistan ke silsile mein mehkama Khel o umoor-e-naujawanan Balochistan ki jaanib se zila Loralai mein khelon ki mukhtalif sargarmiyon ka silsila jari hai, jis ke tahat futsal ke dilchasp muqable munaqid kiye gaye aur naujawan khilariyon ne bharpoor josh o jazbe se shirkat ki.

Muqablon ka maqsad naujawanon ko sehatmand aur musbat sargarmiyon ki jaanib raghib karna, khel ke maidan aabad rakhna aur naujawan nasl mein hubb-ul-watani, nazm o zabt, team work, bhai chare aur musbat musabqat ke jazbe ko farogh dena hai. Khilariyon ne fitness, tez raftari, maharat, behtareen passing aur team work ka muzahira kiya jabke shaiqeen ne bhi gehri dilchaspi li.

Khilariyon ne muqablon ko khush aamdeed qarar dete hue kaha ke khel naujawanon mein khud aitemadi, nazm o zabt, bardasht aur team work ko parwan charhate hain aur maidan aabad hone se naujawan manfi sargarmiyon se door rehte hain. Loralai mein Football samet mukhtalif khelon ki mazboot riwayat maujood hai.

Mehkama Khel o umoor-e-naujawanan ne azm zahir kiya ke Chief Minister ki hidayat ke mutabiq soobe ke naujawanon ko khelon ki behtar sahuliyat aur mawaqe faraham karne ka silsila jari rahega taakeba salahiyat naujawan soobe aur mulk ka naam qaumi o International satah par roshan kar sakein.

Tasveer: Bashukriya DGPR Balochistan