Lasbela Sports Festival ikhtitam pazeer: DC Humaira Baloch aur SSP Najeebullah Pandrani ne fatehin ko trophies deen

Uthal: Jashn-e-Azadi Lasbela Sports Festival ka final round mehkama Khel Lasbela ke taawun aur zilai intizamia ki zere-e-nigrani kamyabi se munaqid hua. Cricket, futsal, volleyball aur saqafati khel Malakhra ke muqablon ne Lasbela ke maidanon ki ronaqen bahal kar deen.

Sports Officer Lasbela Khuda Bakhsh Baloch ki kawishon se zilae ki tamam tehsilon mein muqable hue: tareekhi shehar Bela mein shooting volleyball, Lakhra mein Malakhra, Lyari Kundmalir mein beach cricket, Kanraj mein tape ball cricket aur divisional headquarter Uthal mein hard ball cricket tournament. Ikhtitami taqreebat Jam Kamal Khan Complex aur Jam Muhammad Futsal Stadium Uthal mein munaqid hui.n

Markazi taqreeb mein Deputy Commissioner Lasbela mohtarma Humaira Baloch, SSP Lasbela Najeebullah Pandrani, Additional Deputy Commissioner General Siraj Karim Baloch, Social Welfare Officer Uthal Abdul Samad Baloch, GTA ke zilai sadr Abdul Wahid Soomro wa digar ne Cricket ki fateh team Sardar MBM Club, runner-up MB Shaheen, futsal ki fateh Uthal Bazigar aur runner-up Uthal Eagle ko trophies, medals aur naqd inamat diye.

DC Humaira Baloch ne mehkama Khel Balochistan aur zilai Sports Officer Khuda Bakhsh Baloch ki janib se naujawanon ko musbat sargarmiyon mein mashghool rakhne ki hikmat-e-amli ko saraha aur naujawanon ko taleem, hunar aur sehatmandana sargarmiyon par tawajjoh dene ki talqeen ki. Unhon ne aur SSP Najeebullah Pandrani ne futsal ki fateh wa runner-up teamon aur under 13 kamsin khilari Azaan ko naqd inamat bhi diye.

Zilai Sports Officer ki janib se Cricket teamon, committeyon, ground workers aur behtareen khiladiyon ko trophies aur naqd inamat jabke mehmanon aur muntazimin ko souvenirs pesh kiye gaye. Events ko behtareen security faraham karne par duty officer SI Qadir Bakhsh ko bhi souvenir diya gaya. Khiladiyon ne Chief Minister Balochistan Mir Sarfraz Bugti, Mushir Khel Meena Majeed Baloch, Secretary Khel Dura Baloch, DG Khel Dr Yasir Bazai, Moawin Wazir Dakhila Babar Yousafzai aur DSO Khuda Bakhsh Baloch ka shukriya ada kiya aur aainda bhi aise events ki mezbani Lasbela ko dene ki darkhwast ki.

Tasveer: Bashukriya DG PR Balochistan