Lahore Chamber elections: Vision Alliance ne Associate class mein clean sweep kar diya

Vision Alliance ne Lahore Chamber elections ke dusre marhale mein badi kamyabi hasil kar li, Vision Alliance ne Associate class ke election 1053 panel votes ke bade margin se clean sweep kar diye, PPBA Alliance Associate class ke election mein aik seat bhi na jeet saka, nataij ke mutabiq Associate class ke kul 19087 votes mein se 9728 votes cast hue, Vision Alliance ne 4523 panel votes hasil karke clean sweep kiya.

Lahore Chamber ke Election Commissioner Sajjad Afzal ne kaha ke PPBA ne 3470 panel votes hasil kiye aur dusre number par rahe, PIAF Mian Shafqat 39 panel votes hasil kar saka jabke 310 votes mansookh hue aur split votes 1386 rahe, election pur amn mahaul mein hone par Election Commission arakin ne Vision Alliance, PPBA Alliance aur PIAF Mian Shafqat group ka shukriya ada kiya.

Is se aik din pehle Corporate class ke intakhabat mein Vision Alliance ne 15 nashistaon mein 13 par kamyabi hasil ki jabke PPBA Alliance ke do umeedwar kamyab hue, 30 Executive Committee members ke marhala war intakhabat mein 28 umeedwar Vision Alliance jabke 2 umeedwar PPBA Alliance ke kamyab ho sake hain.

Vision Alliance ke leaders Khawaja Shahzeb Akram ne kaha ke Lahore ki business community ka shukriya ada karne ke liye alfaz nahin hain, Lahore ki business community se kiya wada nibhayenge aur Lahore ke tajir ki izzat ki bahali ke liye maidan-e-amal mein rahenge.

Is mauqe par Vision Alliance ke rehnumaon Sohail Nisar, Sabir Hameed, Nasir Hameed samet digar bhi maujood the, Lahore Chamber ke nomuntakhab ohdedaran namzad sadr Ali Hassam Asghar, senior naib sadr aur naib sadr yakum October se apne ohdon ka charge sambhalein ge.

Wazir-e-aala Maryam Nawaz Sharif ne Lahore Chamber ke election mein kamyabi hasil karne par Vision Alliance ke rehnuma Ali Hassam Asghar aur digar ke liye nek tamannaon ka izhar kiya, apne bayan mein wazir-e-aala ka kehna tha ke umeed hai Lahore Chamber ke ohdedaran sanat o tijarat ke farogh mein hukumat-e-Punjab ka sath nibhayenge.