Koh-e-Sulaiman Division mein doctors ki 85 aasamiyon par walk-in interviews chauthe roz bhi jari

Barkhan/Rakhni: Wazir-e-aala Balochistan Mir Sarfraz Bugti aur hukumat-e-Balochistan ki policy ke mutabiq mehkama Sehat Koh-e-Sulaiman Division mein doctors ki mukhtalif categories ki 85 aasamiyon par walk-in interviews ka silsila chauthe roz bhi jari raha.

Interviews Commissioner Koh-e-Sulaiman Division Mujeeb ur Rehman Qambrani ki zer-e-sadarat hue. Is mauqe par Additional Commissioner Abdul Basit Bazdar, Deputy Commissioner North Dera Bugti Riaz Ahmed Dawar, Divisional Director Health Dr Muhammad Hasan Domki, DHO Kohlu Dr Sher Zaman aur deegar afsaran bhi mojood the.

Interviews ke dauran umeedwaron ki taleemi qabiliyat, pesha-waraana tajurbe, dastavezat aur muqarrara miyar ka tafseeli jaiza liya gaya, aur umeedwaron ko merit aur shaffaf tareeqa-e-kaar ke tehat mawaqe faraham kiye gaye.

Commissioner Mujeeb ur Rehman Qambrani ne kaha ke khali aasamiyon par doctors ki tainaati se division ke door daraz ilaqon mein awam ko behtar tibbi sahuliyat milengi. Unhon ne hidayat ki ke bharti ke tamam marahil merit, shaffafiyat aur qawaid o zawabit ke mutabiq mukammal kiye jayen taake ahal umeedwaron ka intikhab yaqeeni ho. Unhon ne kaha ke hukumat-e-Balochistan door daraz ilaqon mein Sehat ke shobe ko mustahkam karne ke liye iqdamat kar rahi hai.

Tasveer: Bashukriya DG PR Balochistan