Khuzdar mein 79wan Yaum-e-Azadi: Qaid-e-Hizb-e-Ikhtilaf Younus Aziz Zehri aur Commissioner Kalat ki mojoodgi mein parcham kushai

Khuzdar: Mulk bhar ki tarah Khuzdar mein bhi 79wan Yaum-e-Azadi milli josh o jazbe, qaumi yakjehti aur watan se walihana mohabbat ke azm ke saath manaya gaya. Zilai intizamia ke zair-e-ehtimam pur-waqar taqreeb mein Qaid-e-Hizb-e-Ikhtilaf Balochistan Assembly Mir Younus Aziz Zehri, Commissioner Kalat Division Qadir Bakhsh Perkani, DIG Kalat Range Wazir Khan Nasir, Commandant Kalat Scouts Colonel Irfan, SSP Khuzdar Dostain Dashti aur Deputy Commissioner Khuzdar Abdul Razzaq Sasoli ki mojoodgi mein chaq o chobund police dastay ke hamrah qaumi parcham sarbuland kiya gaya.

Qaumi tarane ki goonj mein police dastay ne qaumi parcham ko salami pesh ki aur shurka ne Pakistan ki salamati, istehkam, taraqqi aur khushhali ke liye khusoosi duaen kin.

Taqreeb mein Excise and Taxation Officer Khuzdar Mir Zakir Bajoi, District Officer Dr Abdul Hameed, Divisional Forest Officer Awais Akbar Zehri, Assistant Commissioner Abdul Hafeez Kakar, Additional Deputy Commissioner Rehmat Baloch, Additional Deputy Commissioner Alamuddin, XEN B&R Saleem Razzaq Umrani, XEN PHE Abdul Rauf Qambrani, DSP City Muhammad Alam Lehri aur District Education Officer Abid Hussain Baloch samet tamam zilai mehkamon ke afsaran aur mozzizeen ne shirkat ki. Mehmanon aur afsaran ne qaumi parcham ke hamrah tasaweer bhi banwain.

Shurka ne Pakistan ki azadi ko Allah Taala ki azeem nemat qarar dete hue azm kiya ke mulk o qaum ki taraqqi, aman, istehkam aur khushhali ke liye apni zimmedariyan bharpoor andaz mein ada ki jayengi. Muqarrireen ne kaha ke Yaum-e-Azadi hamein un azeem qurbaniyon ki yaad dilata hai jo hamare buzurgon ne azad watan ke liye din, aur Balochistan samet mulk ke har khitte ki taraqqi hi mazboot, khushhal aur mustahkam Pakistan ki zamanat hai. Shurka ne Quaid-e-Azam Muhammad Ali Jinnah ke ittehad, imaan aur tanzeem ke usoolon ko mash’al-e-rah banane ke azm ka aada kiya.

Tasweer: Bashukriya DG PR Balochistan