Khuzdar: Commissioner Qadir Bakhsh Parkani se Sardar Mehrullah Qambrani samet qabaili umaaidin ki mulaqat, Aman o Aman par baat cheet

Khuzdar: Commissioner Khuzdar Division Qadir Bakhsh Parkani se qabaili umaaidin aur sarkari afsaran ne un ke daftar mein mulaqat ki, jis mein ilaqe ke Aman o Aman, taraqqiyati kaamon aur awami falah se mutaliq umoor par tafseeli baat cheet ki gayi.

Wafd mein Sardar Mehrullah Qambrani, Sardar Hayat Khan Sajidi, JUI Surab ke general secretary Mir Maqbool Ahmed Gargnari, Engineer Abdullah Gargnari, DHO Khuzdar Dr Abdul Hameed Lehri aur Local Government Officer Abdul Qayyum Umrani shamil the. Umaaidin ne commissioner ko ohda sambhalne par mubarakbad di aur ilaqe ke masail se agah karte hue kaha ke bunyadi sahuliyat ki faraahmi, sehat, Taleem aur muwasalat ke shobon mein behtari ki ashad zaroorat hai. Unhon ne intizamiya se mukammal taawun ki yaqeen dehani karayi.

Commissioner Qadir Bakhsh Parkani ne kaha ke awami masail ke hal ke liye tamam wasail barooe kaar laye ja rahe hain, hukumat ki policy awami khidmat hai aur is mein koi kotahi bardasht nahin ki jayegi. Koshish hai ke dastiyab wasail ke andar rehte hue awam ke bunyadi masail hal kiye jayen aur sahuliyat un ki dehleez tak pahunchayi jayen.

Unhon ne kaha ke BSDI ke tehat awam ke bunyadi masail hal karne ki koshish ki ja rahi hai aur sehat, Taleem aur peene ke saaf pani ke mutaddid mansobe isi project ke tehat faraham kiye ja rahe hain. Mulaqat mein bahmi taawun ko farogh dene aur awami masail hal karne par ittefaq kiya gaya.

Tasveer: Bashukriya DG PR Balochistan