Kech mein Polio catch-up muhim: Deputy Commissioner Yasir Iqbal Dashti ka jaiza ijlas, muqarrara hadaf ke mutabiq coverage mukammal

Turbat: Deputy Commissioner Kech Yasir Iqbal Dashti ki zer-e-sadarat Polio muhim ke chauthe roz catch-up ke hawale se ijlas Deputy Commissioner office Turbat mein munaqid hua, jis mein WHO ke zilai sarbarah Dr Arsalan Durazai samet mehkama Sehat aur Polio muhim se mutaliq deegar hukkam ne shirkat ki.

Deputy Commissioner ne muhim ki majmui pesh raft ka jaiza liya aur ibtidai dinon mein reh jane wale bachchon ki catch-up visits ke dauran coverage ki tafseelat daryaft keen. Dr Arsalan Durazai ne bataya ke jo bachche ibtidai dinon mein qatre peene se reh gaye the unhein catch-up muhim ke dauran qatre pilae gaye aur muqarrara hadaf ke mutabiq coverage mukammal kar li gayi hai.

Unhon ne bataya ke zila Kech se bahar mojood bachchon ki wapsi par unhein bhi qatre pilane ke liye mansooba bandi ki gayi hai taake koi bachcha vaccine se mehroom na rahe.

Yasir Iqbal Dashti ne reh jane wale bachchon ki barwaqt nishandehi aur un ki vaccination yaqeeni banane par zor diya aur hidayat ki ke Polio ke khatme ke qaumi maqsad ke liye tamam dastiyab wasail baroye kaar laye jayen. Shurka ne azm zahir kiya ke zila Kech mein har bachche ko Polio se mahfooz rakhne ke liye iqdamat tasalsul se jari rahenge.

Tasveer: Bashukriya DG PR Balochistan