Jashn-e-Azadi: Quetta mein Chief Minister Secretariat sabz o safaid barqi qumqumon se jagmaga utha

Quetta: Jashn-e-Azadi Pakistan ke mauqe par Chief Minister Secretariat ko qaumi jazbe aur hubb-ul-watni ki munasibat se barqi qumqumon aur deeda zeb roshniyon se khoobsurat andaz mein sajaya gaya hai.

Imarat par sabz o safaid roshniyon ke haseen imtizaj ne Jashn-e-Azadi ki khushiyon aur qaumi yakjehti ke jazbe ko ujagar kar diya hai. Shandar lighting aur tazeen o araish ne taqribat ke mahol ko mazeed khoobsurat aur purwaqar bana diya hai, jabke raat ke waqt roshan imarat shehriyon ki khusoosi tawajjuh ka markaz ban rahi hai.

Jashn-e-Azadi ke silsile mein sarkari imaraat aur aham shahraahon ko bhi qaumi parcham, sabz o safaid roshniyon aur mukhtalif araishi designs se sajaya gaya hai taake azadi ki khushiyan bharpoor qaumi jazbe ke saath manayi ja saken.

Chief Minister Secretariat ki barqi sajawat is azm ki bhi akkas hai ke Pakistan ki azadi, khudmukhtari, qaumi ittehad aur taraqqi ke jazbe ko mazeed mazboot banaya jaye. Jashn-e-Azadi ke mauqe par mulk o qaum ki salamti, khushhali aur taraqqi ke liye khusoosi duaen bhi ki ja rahi hain.

Tasveer: Bashukriya DG PR Balochistan