Jashn-e-Azadi Cup Gwadar: GPA ne Gwadar City ko 4-0 se hara kar semi-final mein jagah bana li

Gwadar: Sindh Balochistan Jashn-e-Azadi Cup 2026 banam Shaheed Deputy Commissioner Zakir Baloch Football tournament ka aakhri quarter-final Gwadar Port Authority (GPA) aur Gwadar City Football teamon ke darmiyan Babae Buzenjo Football Stadium mein khela gaya, jis mein GPA ne yaktarfa aur shandar khel pesh karte hue Gwadar City ko 4-0 se shikast de kar semi-final ke liye qualify kar liya. Tournament District Football Association Gwadar ke sadr Mir Arshad Kalmati ke zer-e-ehtimam munaqid ho raha hai.

Match ke aaghaz se hi GPA ki team ne jarehana andaz apnaya aur pure muqable mein khel par mukammal girift rakhi. Us ke khilariyon ne umda team work se chaar goal score kiye, jabke Gwadar City ki team difai dabao se na nikal saki aur koi goal na kar saki.

Match ke mehman-e-khusoosi Bank Al Habib ke manager Shakeel Bana the, jin ka taruf donon teamon ke khilariyon, match officials aur muntazimin se karaya gaya. Unhon ne kaha ke khelon ki sargarmiyan muashre ko musbat simt deti hain aur naujawanon ko sehat mand,ba-salahiyat aur ba-kirdar banane mein aham kirdar ada karti hain, aur Khel jismani ke sath zehni Sehat ke liye bhi intehai zaroori hain.

Unhon ne Mir Arshad Kalmati ki janib se khelon ke farogh aur itne bade tournament ke kamyab inaqad ko sarahte hue kaha ke aisi sargarmiyan naujawanon ko musbat mawaqe dene ke sath Gwadar mein khelon ke roshan mustaqbil ki zamanat hain. Mehman-e-khusoosi ne fateh aur runner-up teamon, match officials aur muntazimin ke liye naqd inamat ka elan bhi kiya.

Is mauqe par sabiq footballers, shehr ke muazzizin, khelon se wabasta shakhsiyat aur shaiqeen-e-Football ki bari tadad stadium mein mojood thi, jinhon ne donon teamon ke khilariyon ki bharpur hausla afzai ki.

Tasveer: bashukriya DGPR Balochistan