Jashn-e-Azadi Cricket Tournament: Nasirabad Division ne final mein Kalat Division ko hara kar title jeet liya

Quetta: Chief Minister Balochistan Mir Sarfraz Bugti ki khusoosi hidayat ki roshni mein mehkama Khel o Umoor-e-Naujawanan Balochistan ke zer-e-ehtimam Jashn-e-Azadi ki munasibat se Ayub Sports Complex Quetta mein mun’aqida Cricket tournament ka shandar final khela gaya, jis mein Nasirabad Division ki team ne umda khel aur behtareen team work ka muzahira karte hue Kalat Division ko shikast de kar title apne naam kar liya.

Final match mein Kalat Division ki team ne toss jeet kar pehle batting ka faisla kiya aur muqarrara overs mein 186 runs banaye, taham Nasirabad Division ke khilariyon ne pur-aitemad andaz mein hadaf ka taaqub karte hue matloobah runs kamyabi se mukammal kiye aur final jeet liya.

Final ke moqe par Ayub Sports Complex mein shaiqeen-e-Cricket ki badi tadad mojood thi, jinhon ne dono teamon ke khilariyon ki bharpoor hosla afzai ki, jabke khilariyon ne match ke dauran khel ke aala miyar, nazm o zabt aur sportsman spirit ka shandar muzahira kiya.

Soobai mushiran ki shirkat

Soobai mushir baraye Khel o Umoor-e-Naujawanan Meena Majeed aur soobai mushir baraye transport Liaquat Lehri bhi final match ke moqe par mojood the, jinhon ne khilariyon ki karkardagi ko sarahte hue kamyab team ko mubarakbad di.

Is moqe par guftagu karte hue soobai mushiran ne kaha ke hukumat-e-Balochistan Chief Minister Mir Sarfraz Bugti ki qiyadat mein naujawanon ko khelon ke behtar aur sazgar mawaqe faraham karne, soobe mein khelon ki sargarmiyon ko farogh dene aurba-salahiyat naujawan khilariyon ko apni salahiyaton ke izhar ke liye mu’assir platform muhaiya karne ke liye amali iqdamat utha rahi hai.

Unhon ne kaha ke Jashn-e-Azadi ke moqe par khelon ke aise muqabilon ka inqad naujawanon mein sehat mand musabiqat, nazm o zabt, bhai chare aur hubb-ul-watni ke jazbaat ko farogh dene ke sath sath unhein musbat aur tameeri sargarmiyon ki janib raghib karne mein aham kirdar ada karta hai.

Soobai mushiran ke mutabiq mehkama Khel o Umoor-e-Naujawanan ki janib se Jashn-e-Azadi ke silsile mein mukhtalif khelon ke muqabilon ka inqad isi azm ka mazhar hai ke Balochistan ke naujawanon ko apni salahiyaten ujagar karne ke bharpoor mawaqe milen aur khelon ke maidanon ko abad kar ke aik sehat mand, mutaharrik aur ba-salahiyat naujawan nasl ki tashkeel yaqeeni banai jaye.

Tasveer: bashukriya DGPR Balochistan