Jafarabad mein pehli martaba khawateen ki khusoosi Khuli Kachehri, taleem, Sehat aur BISP ke masail uthaye gaye

Jafarabad: Deputy Commissioner Jafarabad Khalid Khan ki kawishon se wazir-e-aala Balochistan Mir Sarfraz Bugti aur Chief Secretary Balochistan Shakeel Qadir Khan ke ehkamat aur Commissioner Naseerabad Division Salahuddin Nurzai ki hidayat ki roshni mein zila Jafarabad mein pehli martaba khawateen ke masail jaanne aur un ke hal ke liye khusoosi Khuli Kachehri munaqid ki gayi.

Khuli Kachehri Assistant Commissioner Jhat Pat Dhiraj Kalra ki sarbarahi mein hui, jis mein zile ke tamam mutaliqa mehkamon ke afsaran aur numainde shareek hue. Jafarabad ki kaseer tadad mein khawateen ne shirkat ki aur taleem, Sehat, aab noshi, sarkari mulazmaton mein khawateen ke jaiz hisse aur Benazir Income Support Programme mein darpesh mushkilat samet deegar masail se afsaran ko aagah kiya.

Tamam khawateen sailin ki shikayat fardan farda aur bil-tarteeb suni gayin, jabke mutaliqa mehkamon ke afsaran ne un ke masail par jawabat diye aur mumkina hal se aagah kiya.

Assistant Commissioner Dhiraj Kalra ne kaha ke wazir-e-aala Balochistan aur Chief Secretary ki khusoosi hidayat par yeh kachehri munaqid ki gayi hai taake khawateen ko apne masail barah-e-raast zilai intizamia aur afsaran ke samne rakhne ka moassar platform mile aur un ka barwaqt izala ho sake. Unhon ne kaha ke zilai intizamia khawateen ke masail ke hal aur bunyadi sahuliyat ki faraahmi ke liye har mumkin iqdamat karegi.

Tasveer: Bashukriya DGPR Balochistan