Jafarabad mein Jashn-e-Azadi: Parliamentary Secretary Abdul Majeed Badini aur DC Khalid Khan ne parcham lehraya

Jafarabad: Zila Jafarabad mein Jashn-e-Azadi ki taqribat ka aghaz duaon se kiya gaya, baad azan Deputy Commissioner Office mein parcham kushai ki purwaqar taqreeb hui jis mein soobai Parliamentary Secretary baraye S&GAD Engineer Abdul Majeed Badini aur Deputy Commissioner Jafarabad Khalid Khan ne deegar afsaran ke hamrah qaumi parcham lehraya aur police ke chaq o chobond dastay ne salami pesh ki.

Taqreeb mein Mayor Dera Allahyar Mir Asfandyar Jamali, SSP Muhammad Maroof Usman, Additional Deputy Commissioner Huzoor Bakhsh Bugti, Chief Officer Municipal Corporation Ahmed Nawaz Jatak, Executive Engineer Public Health Engineering Muhammad Kazim Looni samet mukhtalif mehkamon ke afsaran, talba o talibat aur aqliyati biradari ke rehnumaon ne shirkat ki. Jashn-e-Azadi ka cake kata gaya jabke Deputy Commissioner aur Parliamentary Secretary ne Shajarkari muhim ke tehat paudhe bhi lagaye.

Khalid Khan aur Engineer Abdul Majeed Badini ne khitab mein kaha ke azadi hamare buzurgon ki lazawal qurbaniyon ka samar hai, hamein is ki qadr karte hue qaumi ittehad o yakjehti ko farogh dena hoga. Pakistan ki taraqqi, khushhali aur istehkam ke liye har shehri apni zimmedari ahsan andaz mein ada kare aur watan ki salamti ke liye sab mil kar kirdar ada karein.

Tasweer: Bashukriya DGPR Balochistan