Jafarabad mein Eid Milad un Nabi (SAW) ki rallyan, Dera Allahyar ke markazi juloos mein hazaron ashiqan-e-rasool (SAW) shareek

Jafarabad: Jashn-e-Eid Milad un Nabi Hazrat Muhammad Mustafa (SAW) ke silsile mein zila Jafarabad ke mukhtalif ilaqon se mazhabi josh o jazbe aur aqeedat o ehtram ke saath rallyan nikali gayin. Deputy Commissioner Jafarabad Khalid Khan ke ahkamat ki roshni mein zilai intizamia ne is mauqe ke tamam intizamat ko hatmi shakl di thi; rallyon ke routes par safai suthrai ke khusoosi intizamat kiye gaye, jabke shurka ki hifazat aur Aman o Aman yaqeeni banane ke liye security ke sakht intizamat bhi kiye gaye.

Dera Allahyar mein markazi juloos nikala gaya, jis mein hazaron ashiqan-e-rasool (SAW) ne shirkat ki. Shurka ne durood o salam, naat-e-rasool-e-maqbool (SAW) aur Labbaik Ya Rasool Allah (SAW) ke naron se fiza ko moattar kar diya. Juloos ke raston par shehriyon ne mukhtalif maqamat par istaqbal kiya aur shurka mein langar aur sharbat bhi taqseem kiya gaya.

Is mauqe par Assistant Commissioners, tehsildaran aur deegar mutaalliqa afsaran Deputy Commissioner ke ahkamat ki roshni mein intizamat ka musalsal jaiza lete aur juloos ke routes, safai, traffic aur security intizamat ki nigrani karte rahe.

Deputy Commissioner Khalid Khan ne kaha ke Jashn-e-Eid Milad un Nabi (SAW) mulk bhar ki tarah zila Jafarabad mein bhi mazhabi josh o kharosh, aqeedat aur ehtram ke saath manaya gaya, aur zilai intizamia ne ashiqan-e-rasool (SAW) ko har mumkin sahulat aur puramn mahaul faraham karne ke liye tamam dastiyab wasail baroye kaar laye. Unhon ne kaha ke yeh din mohabbat, ukhuwwat, bhai chare aur aman ka paigham deta hai, is liye tamam makatib-e-fikr ko bahami ehtram aur ittehad ka muzahira karte hue is azeem din ki khushiyan manani chahiyen.

Tasveer: bashukriya DGPR Balochistan