Jafarabad: Assistant Commissioner ka petrol pumps ka achanak muaina, wazir-e-azam petrol relief scheme ke tokens ki jaanch

Jafarabad: Deputy Commissioner Jafarabad Khalid Khan ke ahkamat ki roshni mein Assistant Commissioner Jhat Pat Dheeraj Kalra ne shehar ke mukhtalif petrol pumps ka achanak muaina kiya. Muaine ke dauran petrol ki dastiyabi, paimaish o gauge, muqarrara nirkhnaame aur nirkhon ki numayan aweezaan samet deegar intezamat ka tafseeli jaiza liya gaya.

Assistant Commissioner ne wazir-e-azam ki khusoosi petrol relief scheme ke tahat jaari kardah tokens aur mutalliqa record bhi check kiya aur pump intezamia ko hidayat ki ke scheme ke tahat mustahiq shehriyon ko muqarrara tareeqa kar ke mutabiq relief ki faraahmi yaqeeni banai jaye, jabke tokens aur record mein mukammal shaffafiyat barqarar rakhi jaye.

Unhon ne petrol pumps par paimaish ke nizam aur record ka bhi muaina kiya aur hidayat ki ke awam ko muqarrara nirkhon ke mutabiq miyari aur durust miqdar mein petrol ki faraahmi yaqeeni banai jaye.

Assistant Commissioner Dheeraj Kalra ne wazeh kiya ke petrol pumps par nirkhnaama numayan taur par aweezaan rakhna, durust paimaish, muqarrara nirkhon ki pabandi aur wazir-e-azam ki khusoosi relief scheme par shaffaf tareeqa kar ke tahat amalraamad lazmi hai, aur kisi bhi khilaf warzi ki soorat mein mutalliqa qawaneen ke tahat karrawai amal mein layi jaye gi. Unhon ne kaha ke awam ko relief ki faraahmi aur petrol pumps ki nigrani ka amal baqaidagi se jaari rakha jaye ga.

Tasveer: Bashukriya DGPR Balochistan