Hukumat buzurg shehriyon ki falah-o-behbood ke liye iqdamat kar rahi hai: Maryam Nawaz

Buzurg afraad ke alami din par apne paigham mein wazir-e-aala Punjab Maryam Nawaz Sharif ne buzurgon ko zabardast khiraj-e-tehseen pesh kiya, aur tamam buzurgon ki Sehat aur salamati ke liye duaen kin.

Unhon ne kaha ke buzurg hamare mazi ka aks, haal ki roshni aur mustaqbil ke liye aik sabaq hain, buzurg woh charagh hain jin ki roshni mein naslein parwan charhti hain, buzurgon ne apni jawani ki tawanaiyan, tajurbaat aur qurbaniyan de kar hamare roshan aaj ko mumkin banaya, buzurgon ka ehtaram hamare aqaid aur tehzeeb ka hissa hai.

Un ka kehna tha ke buzurgon ki zindagi ke tajurbaat aur mushahidaat khazane ke mutradif hain, buzurgon ke huqooq ki pasdari aur khidmat farz hai, buzurgon ko kabhi faramosh na karein unhein izzat aur maqam dein ge jis ka woh haq rakhte hain.

Maryam Nawaz Sharif ne kaha ke hukumat buzurg shehriyon ki izzat, falah-o-behbood ke liye iqdamat kar rahi hai, hukumat Punjab buzurg shehriyon ke liye old homes ko mazeed behtar bana rahi hai, old home mein muqeem buzurg mard-o-khawateen ne Hajj ki saadat bhi hasil ki, Punjab hukumat electric busson mein buzurg afraad ko muft safar ki sahulat faraham kar rahi hai.

Wazir-e-aala Punjab ne naujawanon se appeal ki ke apne buzurgon ka ehtaram, un ki izzat aur khidmat karein.