Hub ki Akram Colony mein TB ki tashkhees o ilaj ka aik roza muft medical camp ikhtitam pazeer

Hub: Akram Colony mein TB (tap-e-diq) ki tashkhees aur ilaj ke hawale se mun’aqida aik roza muft medical camp kamyabi se ikhtitam pazeer ho gaya. Ilaqe ke shehriyon ne kaseer tadad mein shirkat ki aur muft tibbi sahuliyat se faida uthaya.

Yeh camp Pakistan PPP se wabasta Municipal Committee Hub ke councillor Abdul Razzaq Lasi ki zer-e-sarparasti mun’aqid kiya gaya.

Camp ka bunyadi maqsad awam ko TB ki barwaqt tashkhees, tibbi mu’ayne, muft X-ray aur tibbi rehnumai ki sahuliyat faraham karna tha. Is ka maqsad awam mein TB se mutaliq shaoor ujagar karna aur is qabil-e-ilaj bimari ki barwaqt tashkhees o ilaj ki ahmiyat se agah karna bhi tha.

Is mauqe par Abdul Razzaq Lasi ki samaji khidmat aur awami falah ke jazbe ko saraha gaya. Un ki mukhlisana soch, samaji khidmat aur awami masail ke hal ke liye amali iqdamat ko ilaqe ke liye aik musbat pesh raft qarar diya gaya.

Awam ko paigham diya gaya ke Sehat ke masail ko nazar andaz karne ke bajaye barwaqt tibbi mu’ayna karwana chahiye taake tashkhees ke baad munasib ilaj mumkin ho sake.

Siyasi o samaji halqon ke mutabiq awami numainDon ki jaanib se Sehat, Taleem aur digar bunyadi zaruriyat ke shobon mein falahi sargarmiyon ka inaqad khush aind hai. Un ke mutabiq awami khidmat ka asl maqsad logon ko relief faraham karna aur zaroorat mand tabqat ki mushkilat kam karne ke liye amali kirdar ada karna hai.

Abdul Razzaq Lasi ki jaanib se muft TB medical camp ka inaqad awami khidmat aur samaji zimmedari ki aik qabil-e-tehseen misal qarar diya gaya, jis se ilaqe ke shehriyon ko tibbi sahuliyat se istifada karne ka mauqa mila.