Hub Chamber of Commerce ki Commissioner Lasbela ko briefing: bijli, gas, railway line aur Marble City ke masail ujagar

Hub: Commissioner Lasbela Division ki zer-e-sadarat Chamber of Commerce Hub mein sanatkaron, LDA hukkam, Environment Department aur Labour Welfare Department ki joint meeting munaqid hui, jis mein Deputy Commissioner Hub Jamdad Mandokhail, maroof sanatkar o Chamber of Commerce ki Executive Committee ke sadr Yaqoob Karim, General Secretary Rifat Anjum, Executive Committee member Shoaib aur deegar shareek hue.

General Secretary Rifat Anjum ne Hub Industrial Zone ke sanati units ki operational sargarmiyon aur sanatkaron ko darpesh masail par briefing di. Unhon ne bataya ke Lasbela Chamber of Commerce 1995 mein registered hua aur 2022 mein intizami tabdili ke baad Hub Chamber of Commerce qaim kiya gaya. Sarmayakar tezi se phailte sanati shehar Hub ke Special sanati zone mein sarmaya-kari karna chahte hain aur hukumat ne 406 acre SEZ ke liye mukhtas kiye hain.

Bijli aur gas ki faraahmi

Unhon ne bataya ke naye sanati zone aur industries ke liye bijli ki faraahmi mein K-Electric ki jaanib se munasib response na milne ki wajah se LDA ka SEZ mansooba aage nahin barh raha, aur sanatkar arbon rupay tax ada karne ke bawujood masail se dochar hain. Karachi port se nazdeek tareen LDA ke sanati shobe ke liye 50 megawatt ke power plant ka mansooba kai saalon se pipeline mein hai.

Rifat Anjum ne kaha ke gas Balochistan se nikalti hai lekin Balochistan ke sanatkar aaj bhi is bunyadi sahulat se mehroom hain, halanke yeh aini haq hai ke jis soobe se gas nikalti hai us ke sanati idaron ko gas faraham ki jaye. Unhon ne tajweez di ke hukumat Karachi se Gadani tak railway line bichane ki manzoori de to Gadani ki ship breaking industry samet zila Hub ki sanati paidawar barhe gi aur siyahat ko bhi farogh milega.

Unhon ne bataya ke factories ke audit aur jadeed machinery ki tansib ke liye ghair mulki engineers ki khidmaat ke liye NOC darkar hota hai, jis ke ijra ke liye security SOPs ko sahal banane ki zaroorat hai; Khyber Pakhtunkhwa hukumat ne online NOC ka model mutaarif karaya hai aur Balochistan mein bhi is par kaam ki zaroorat hai.

Marble industry ke baare mein bataya gaya ke Marble City ka infrastructure nakara ho chuka hai aur sarkein toot phoot ka shikar hain. MD LDA ki koshishon se SP Hub ne police security taynati ke orders kiye magar un par amal nahin hua, Gadani Marble City ki bijli supply line ki taarein chori hona maamool ban chuka hai, aur sahuliyat ke fuqdan ke baais mines owners Karachi Mangopir jane par majboor ho jate hain. Chamber ne Commissioner ki jaanib se joint meeting ke inqaad ko musbat iqdam qarar diya.

Tasveer: Bashukriya DGPR Balochistan