Hadsat aur hangami halat mein barwaqt ibtidai tibbi imdad nagzeer hai, Maryam Nawaz Sharif

Wazir-e-aala Punjab Maryam Nawaz Sharif ne World First Aid Day par apne paigham mein Rescue 1122 service faraham karne wale rescuers aur hospitalon ke emergency staff ko kharaj-e-tehseen pesh karte hue kaha hai barwaqt first aid qeemati insani jaan bachane ke liye bohat ahmiyat rakhti hai, hadsat aur hangami halat mein ibtidai tibbi imdad nagzeer hai.

Maryam Nawaz Sharif ne kaha ke mehfooz aur Sehat mand muashre ke liye awam mein first aid ka shaoor ujagar karna zaroori hai. Punjab hukumat hangami surat-e-haal mein qeemati insani janein bachane ke liye tamam tar maisar wasail faraham karne ki policy par amal paira hai.

Wazir-e-aala Punjab ke mutabiq Punjab golden hours ke dauran mareez ke yaqeeni ilaj ke liye air ambulance shuru karne wala pehla soba hai, jabke hukumat-e-Punjab hangami tibbi khidmat ko behtar banane ke liye tamam mumkina iqdamat kar rahi hai.

Maryam Nawaz Sharif ne kaha ke Sailab mutasira ilaqon mein clinic on wheels, field hospital aur clinic on boats ke zariye first aid aur rescue services faraham ki gayin.

Wazir-e-aala Punjab ne kaha ke Rescue 1122 din raat insaniyat ki khidmat aur hadsat ke shikar afraad ko fori tibbi imdad faraham karne mein masroof-e-amal hai. Har shehri, bil-khusoos naujawanon aur talba o talibat ko bunyadi first aid ki tarbiyat hasil karni chahiye