Gwadar Safe City mansoobah: Cabling aur poles ki tansib taqriban mukammal, agle marhale mein jadeed cameras nasb honge

Gwadar: Gwadar ko jadeed, mehfooz aur smart port city mein tabdeel karne ke vision ke tehat Gwadar Safe City mansoobay par tezi se pesh raft jari hai. Is silsile mein project director Gwadar Safe City Dr Asif Khan Barech ne Director General Gwadar Development Authority Moin ur Rehman Khan se unke daftar mein mulaqat ki. Is moqe par chief engineer GDA Haji Syed Muhammad bhi mojood the.

Project director ne mansoobay ki ab tak ki pesh raft, jari tameeraati kaam aur aainda marahil par briefing dete hue bataya ke shehr ke aham, hassas aur masroof maqamat par security cameras ki tansib ke liye underground cabling aur poles ki tansib ka kaam taqriban mukammal ho chuka hai, jabke agle marhale mein jadeed cameras ki installation shuru ki jaye gi.

Unhon ne bataya ke mansoobay ke markazi complex aur Command and Control Center ki tameer bhi tezi se jari hai. Markazi control center mukammal hone ke baad shehr bhar ke cameras ko aik marboot digital network ke zariye markazi nizam se joda jaye ga, jis se Gwadar mein chaubees ghante moassir nigrani ka nizam qaim hoga.

Director General GDA Moin ur Rehman Khan ne kaha ke Gwadar Pakistan ka maashi mustaqbil aur aalami sarmayakari ka ubharta hua markaz hai, jis par duniya bhar ke sarmayakaron aur karobari idaron ki nazarein hain, is liye shehriyon, sarmayakaron, ghair mulki mahireen, karobari shakhsiyaat aur sayyahon ke liye mehfooz mahaul nagzeer hai.

Unhon ne kaha ke Safe City mansoobah shehr ke security infrastructure ko jadeed khutoot par ustuwar karne ke sath sarmayakari, tijarat aur taraqqiati sargarmiyon ke liye sazgar mahaul paida karega. Mansoobay ki barwaqt takmeel GDA ki tarjihaat mein shamil hai aur mutalliqa shobon ko kaam ki raftar mazeed tez karne ki hidayat kar di gayi hai.

Tasveer: Bashukriya DG PR Balochistan