Gwadar: PPHI ke District Manager Dr Murshid Dashti ka BHU Pulleri ka monitoring daura, amla hazir paya gaya

Gwadar: Chief Minister Balochistan Mir Sarfraz Bugti ke vision ke mutabiq awam ko un ki dehleez par miyari aur bunyadi Sehat ki sahuliyat ki faraahmi yaqeeni banane ke liye PPHI Balochistan ki janib se bunyadi marakiz-e-sehat ki musalsal nigrani ka amal jari hai.

Isi silsile mein District Manager PPHI Gwadar Dr Murshid Dashti ne bunyadi markaz-e-sehat (BHU) Pulleri ka tafseeli monitoring daura kiya aur tibbi o paramedical amle ki hazri, OPD register, EPI (tauseei program bara-e-Hifazati Teeka Jat) ke intezamat, adwiyat ke dastiyab zakhire, record ki dekh bhaal aur mareezon ko di jane wali tibbi sahuliyat ka jaiza liya.

Moainay ke dauran tamam tibbi o moawin amla duty par mojood paya gaya, jabke BHU mein zaroori adwiyat ka wafir zakhira bhi dastiyab tha. District Manager ne record ki tarteeb aur Sehat ki sahuliyat ki faraahmi par itminan ka izhar kiya aur amle ko hidayat ki ke mareezon ke saath khush akhlaqi se pesh aayein aur unhein barwaqt, miyari aur bila tatal tibbi khidmat faraham karein.

Dr Murshid Dashti ne kaha ke Chief Minister Balochistan ke awam dost vision ke mutabiq door daraz ilaqon ke awam tak bunyadi Sehat ki miyari sahuliyat ki faraahmi PPHI ki awwaleen tarjeeh hai, aur is maqsad ke liye tamam bunyadi marakiz-e-sehat ki baqaida nigrani, karkardagi ke jaizay aur tibbi sahuliyat ki musalsal behtari ko yaqeeni banaya ja raha hai.

Tasveer: bashukriya DG PR Balochistan