Gwadar Port par Bangladeshi jahaz langar andaz, 53 hazar metric ton se zaid steel billets ki transshipment

Gwadar: Ilaqai bahri surat-e-haal aur jari kashidagi ke bawajood Gwadar Port par tijarati sargarmiyan jari hain, jahan aik aur transshipment jahaz ne bandargah par langar andaz ho kar cargo ki handling shuru kar di.

Tafseelat ke mutabiq 18 July ko Bangladeshi parcham bardar jahaz M/V JAHAN BROTHERS II Gwadar Port par langar andaz hua. Jahaz Singapore se Gwadar pahuncha hai aur is par 53,064.660 metric ton prime steel billets mojood hain, jin ki manzil UAE ki Al Hamriyah Port hai.

Cargo ko Gwadar Port par arzi taur par utar kar zakhira kiya jayega, jis ke baad ise dusre jahaz par dobara load kar ke UAE rawana kiya jayega.

Wafaqi wazir: bandargahi salahiyaton par barhte aitmad ka mazhar

Wafaqi wazir bara-e-bahri umoor Junaid Anwar Chaudhry ne kaha ke mojooda ilaqai bahri surat-e-haal ke bawajood Gwadar Port par tijarati sargarmiyon ka tasalsul Pakistan ki bandargahi salahiyaton aur bahri shobe mein barhte hue aitmad ka mazhar hai, aur transshipment sargarmiyon mein izafa Gwadar Port ke strategic mahal-e-wuqoo aur khitte mein aik aham mutabadil tijarati raste ke taur par is ki salahiyaton ko ujagar karta hai.

Unhon ne kaha ke hukumat Pakistan bandargahi infrastructure ko mazeed mazboot banane, International shipping lines ko sahuliyat faraham karne aur ilaqai tijarat ke tasalsul ko yaqeeni banane ke liye iqdamat jari rakhe hue hai.

Chairman Gwadar Port Noorul Haq Baloch ne kaha ke mojooda surat-e-haal ke bawajood Gwadar Port par tijarati aur bandargahi sargarmiyon ka jari rehna is baat ka saboot hai ke bandargah khitte mein mahfooz, qabil-e-aitmad aur moassir tijarati markaz ke taur par apni salahiyatein sabit kar rahi hai.

Unhon ne kaha ke transshipment cargo ki kamyab handling se International shipping lines ka Gwadar Port par aitmad mazeed mazboot ho raha hai, jabke bandargah ilaqai tijarat ke tasalsul aur mutabadil tijarati raste ke taur par apni ahmiyat ko mazeed mustahkam kar rahi hai. Un ka kehna tha ke Gwadar Port bandargahi operations ko moassir andaz mein jari rakhne aur ilaqai tijarat ko sahulat faraham karne ke liye pur-azm hai.

Gwadar Port par transshipment cargo ki kamyab handling bandargah ki barhti hui operational salahiyat aur International aitmad ki akkasi karti hai.

Tasveer: bashukriya DGPR Balochistan