Gwadar: Model High School ke boat making center mein talba kashtiyon ke model banane ka hunar seekh rahe hain

Gwadar: Wazir-e-aala Balochistan Mir Sarfraz Bugti ke vision ke tahat nawjawanon ko jadeed o rawayati hunar se arasta karne, fanni Taleem ke farogh aur maqami saqafati warse ke tahaffuz ke iqdamat ke silsile mein Assistant Commissioner Gwadar Romail Naeem Jan ne Model High School Gwadar mein qayam boat making center ka daura kiya.

UNICEF ke taawun se qayam is fanni tarbiyati markaz mein Adil Nodezai ne Assistant Commissioner ko talba ki tarbiyat aur sargarmiyon par briefing di. Bataya gaya ke Gwadar ki qadeem samandari shanakht aur sahili saqafat se jure rawayati hunar ko nayi nasl tak muntaqil karne ke liye talba ko chhoti aur dideh zeb kashtiyon ke model tayyar karne ki amali tarbiyat di ja rahi hai.

Markaz mein primary ki aala jamaaton se high school tak ke talba yeh hunar seekh rahe hain, jo fanni salahiyaton ke farogh ke sath Gwadar ki samandari tehzeeb, saqafati warse aur maqami shanakht ki akkasi bhi karta hai. Tarbiyat ke liye do tarbiyat yafta instructors khidmat anjam de rahe hain aur jadeed aalat o zaroori sahuliyat bhi faraham ki gayi hain.

Assistant Commissioner ne talba ke tayyar kardah models ka moaina kiya, un ki takhliqi salahiyaton ko saraha aur is iqdam ko rawayati hunar ke tahaffuz aur maqami dastkari ke farogh ki janib aham qadam qarar diya. Unhein bataya gaya ke markaz ki masnoaat Gwadar shehr mein qayam maqami outlet ke zariye farokht ki ja rahi hain.

Assistant Commissioner ne hidayat ki ke bare shehron, bil-khusus Karachi, ki market tak rasai ke imkanat ka jaiza liya jaye taake talba ki masnoaat ko wasee mandi mile aur Gwadar ki samandari shanakht mulk bhar mein ujagar ho. Unhon ne instructors, school intizamia aur UNICEF ki kawishon ko sarahte hue kaha ke fanni tarbiyat, maqami hunar ka tahaffuz aur nawjawanon ko rozgar ke qabil banana hukumat ki tarjihat mein shamil hai, aur umeed zahir ki ke aise iqdamat se nawjawan apni takhliqi salahiyaton ko maashi mawaqe mein badal sakenge.

Tasveer: Bashukriya DGPR Balochistan