GSP Plus ke tehat Europe ko Pakistani baramadat 108 feesad se zaid barhin: Atif Ikram Sheikh

Karachi: Federation of Pakistan Chambers of Commerce and Industry (FPCCI) ke sadr Atif Ikram Sheikh ne kaha hai ke European Union Pakistan ka aham tijarati aur taraqqiyati sharakat dar hai, jabke GSP Plus ke tehat European mandiyon tak tarjihi rasai mulki baramadat aur maashi istehkam ke liye bunyadi ahmiyat rakhti hai.

Unhon ne yeh baat Pakistan mein European Union ke safeer Raimondas Karoblis ke Karachi mein FPCCI ke markazi daftar ke daure ke moqe par kahi. Mulaqat mein tijarati mawaqe barhane, sanati rawabit mazboot banane aur GSP Plus ke aainda marhale ke liye nijji shobe ki taiyariyon par tabadla-e-khayal kiya gaya.

Atif Ikram Sheikh ke mutabiq guzishta ek dahai mein tarjihi tijarati sahulaton ke baais European mandiyon mein Pakistan ki baramadat mein 108 feesad se zaid izafa hua.

Aainda marhale ki taiyari

Unhon ne kaha ke Pakistani sanat ko insani huqooq, mazdooron ki falah o behbood, mahaulyati tahaffuz aur achhi hukmarani se mutaliq International muahidon par amal daramad yaqeeni banana hoga.

Un ka kehna tha ke FPCCI qabil-e-tajdeed tawanai, digital khidmat, aala miyar ki textile masnoat aur zarai ajnas ki processing samet mukhtalif shobon mein mushtarka mansooba aur European sarmaya kari ke farogh ke liye kirdar ada karegi. Koshish hogi ke rawayati khareed o farokht ke talluqat ko taweel muddati karobari sharakat dari aur Technology ki muntaqli ke mansoobon mein tabdeel kiya jaye.

European Union ke safeer Raimondas Karoblis ne tijarati sargarmiyon aur policy iqdamat ke darmiyan rawabit qaim karne mein FPCCI ke kirdar ko saraha aur Pakistan ki paidar iqtisadi taraqqi ke liye European Union ke azm ka aada kiya.

Unhon ne kaha ke GSP Plus iqtisadi taraqqi ke farogh ka moasir zariya hai, taham Pakistani baramad kunindgan ko rawayati textile ke alawa engineering ki qadar afza masnoat, ittilaati Technology ki khidmat, chamde ki masnoat aur ghizai ashya samet deegar shobon mein bhi mawaqe se faida uthana chahiye. Unhon ne insani huqooq aur mazdooron ki falah o behbood se mutaliq International muahidon par amal daramad behtar banane ki zarurat par bhi zor diya.

FPCCI ke senior naib sadr Saqib Fayyaz Magoon ne kaha ke Pakistani sanat ko tijarati muahidon se bharpoor faida uthane aur aalmi rasadi zanjeeron mein utar chadhao ke asarat se nimatne ke liye amali maashi iqdamat ki zarurat hai. European mandiyon mein musabiqat barqarar rakhne ke liye tijarati sahulaton mein behtri, zabton mein hum ahangi aur karobari akhrajat mein kami nagzeer hai.

FPCCI ke Pak-European Union Business Forum ke sarbarah Zubair Baweja ne karobari idaron ke darmiyan derpa rawabit aur barah-e-raast karobari sharakat dari ke farogh ke liye kiye jane wale iqdamat se agah kiya. Un ke mutabiq forum ka qiyam European khareedaron aur Pakistani baramad kunindgan ke darmiyan moasir aur amali rawabit qaim karne ki koshishon ka hissa hai.