Governor Mandokhail ka Health Care Skills Training ke Top Ten Learners ko 50, 50 hazar rupay dene ka elan

Quetta: Governor Balochistan Jafar Khan Mandokhail ne kaha hai ke soobe ki majmooi sharh-e-khwandagi mein 7 feesad izafa aur saat lakh adsath hazar bachon ko dobara schools mein wapas lana mehkama Taleem Balochistan ki aik qabil-e-fakhr kamyabi hai.

Unhon ne kaha ke wazir-e-azam Pakistan ke taleemi program ke tehat soobe bhar mein das Danish Schools ke qayam se taleemi inqilab barpa ho jaye ga, jis se bade paimane par miyari Taleem ke farogh aur nojawan nasl ke roshan mustaqbil ki raah hamwar hogi.

Governor Mandokhail ne Health Care Skills Training mein numayan karkardagi ka muzahira karne wale Top Ten Learners ki shandar kamyabiyon ko sarahte hue unhein pachas pachas hazar rupay naqd dene ka elan kiya. Woh hukumat Balochistan ke Directorate of Education Schools aur UNICEF ke zer-e-ehtemam munaqida taqreeb se khitab kar rahe the.

Taqreeb mein soobai wazir Taleem Rahila Hameed Khan Durrani, Mir Asim Kurd Gailo, rukn National Assembly Jamal Shah Kakar, parliamentary secretary Barkat Rind, rukn soobai assembly Kalsoom Niaz, vice chancellor Bolan Medical University Dr Shabbir Lehri, secretary Taleem Lal Jan Jafar, principal secretary to Governor Balochistan Abdul Nasir Dotani, UNICEF se Sahrish Nagi, Shazia, Iftikhar Shah, Naqeebullah Khilji aur Noorullah Watan Dost maujood the.

Skills development waqt ki aham zaroorat

Is mauqe par Governor ne Health Care Skills Training mein numayan karkardagi par UNICEF, mehkama Taleem aur Bolan Medical University ki koshishon ko saraha. Unhon ne kaha ke maharaton ki taraqqi (skills development) waqt ki aham tareen zaroorat ban chuki hai. “Mujhe khushi hai ke Bolan University of Medical and Health Sciences ne health and medical ke shobon mein mukhtalif diploma programs mutaarif karaye hain jin ke nihayat hosla afza aur shandar nataij samne aa rahe hain.”

Governor ne kaha: “Meri khwahish aur bharpoor koshish hai ke Quetta shehar ke muzafat mein Kuchlak Road ke qareeb aik hazar beds par mushtamil jadeed hospital aur aik technical university qayam ki jaye jahan nojawanon ko health care, engineering, information Technology aur deegar jadeed shobon mein alami miyar ki maharatein faraham ki jayein.”

Unhon ne kaha ke skills development ko taleemi nisab ka baqaida hissa banana waqt ki aham tareen zaroorat hai takay nojawan nasl amali salahiyaton aur jadeed maharaton se aarasta ho kar mulk o qaum ki taraqqi mein muassir kirdar ada kar sake.

Taqreeb se soobai wazir Taleem Rahila Hameed Khan Durrani aur vice chancellor Dr Shabbir Lehri ne bhi khitab kiya. Qabl azin Governor Jafar Khan Mandokhail ne Health Care Skills Training ke Top Ten Learners mein certificates aur muntazimeen mein yadgari shields taqseem kin.

Tasveer: bashukriya DGPR Balochistan