Gadani Ship Breaking Modernization: 12 arab rupay ke mansoobe par kaam jari, Commissioner Lasbela ka site ka daura

Gadani: Hukumat-e-Pakistan ne Hong Kong Convention ki touseeq ke baad ship recycling green yard mansoobe par kaam shuru kar diya hai. Federal PSDP ke tahet 12 arab rupay ki lagat se Gadani ship breaking industry ki modernization project par amal daramad jari hai, jis ki nigrani BDA Balochistan regulatory authority ke taur par kar rahi hai.

Commissioner Lasbela Division Saira Atta ne 100 acre raqbe par mushtamil Gadani project site ke mukhtalif hisson ka daura kiya. Project Director Saeed Umrani ne bataya ke Hong Kong Convention ke tahet yard mein waste management plan site, 30 bistaron ka hospital, fire fighting rescue center, labour training center, solar system ki tansib, school ki tameer, green yard aur deegar mansoobon par kaam shuru kar diya gaya hai.

Briefing mein bataya gaya ke yard ke touseeai mansoobe par bhi kaam shuru ho chuka hai aur consultant ki khidmat hasil ki gayi hain. ECNEC ne 2024 mein mansoobe ki manzoori di aur 2025 mein kaam shuru hua. National Steering Committee ke faislon ki roshni mein consultancy o feasibility study ke liye mansoobe ke paanch feesad funds makhsoos kiye gaye hain.

Project Director ke mutabiq e-tendering ke zariye pehle marhale mein 26 acre raqbe par 5 megawatt solarization, 19 acre raqbe par high school aur saat hazar murabba foot par doctors colony ki tameer ka kaam shuru kiya gaya hai aur work orders jari kiye gaye hain, taham Deputy PD, engineers, Director Finance aur Director Admin ki taqarruri abhi baqi hai.

Unhon ne bataya ke Pakistan 6 December 2023 ko bahri jahazon ki mehfooz aur mahaul ke lihaz se durust recycling se mutaliq Hong Kong ke International Convention ki touseeq karne wala 23wan mulk bana.

Tasveer: Bashukriya DG PR Balochistan