FBR ki tanzeem-e-nau ke khilaf qalam chhor hartal ki call wapas, afsaran aaj mamool ke mutabiq kaam karenge

Islamabad: Federal Board of Revenue (FBR) ki Inland Revenue Service Officers Association (IRSOA) ne idare ki mujawwaza tanzeem-e-nau ke khilaf peer 19 October ko di jane wali qalam chhor hartal ki call wapas le li hai. Is ke baad FBR headquarters aur field formations mein tamam afsaran mamool ke mutabiq farayez anjam denge.

Association ne guzishta raat gaye jari elaamiye mein hartal ki call wapas lene ki tasdeeq ki. Elaamiye ke mutabiq FBR ki mujawwaza tanzeem-e-nau se mutaliq gardish karne wale bayanat ibtidai mushawarat ke douran samne aane wali ittilaat ki akkasi karte the, taham unhein hatmi shakl nahin di gayi thi.

Elaamiye mein kaha gaya ke FBR ki aala qiyadat ne yaqeen dehani karayi hai ke Inland Revenue Service ke mufadat ko awwalin tarjeeh di jayegi aur islahati amal ke douran un ka mukammal tahaffuz yaqeeni banaya jayega.

IRSOA ne aala qiyadat ki yaqeen dehani par aitemad ka izhar kiya aur kaha ke association Inland Revenue Service aur qaumi khazane ke wasee tar mufad mein FBR ke sath taameeri baat cheet jari rakhne ki khwahan hai.

Dusri janib zaraye ke mutabiq FBR intezamia aur hukumat ke shadeed dabao ke baes association ne hartal ki call wapas li hai. Taham association ke bazabta elaamiye mein faisle ki wajah aala qiyadat ki yaqeen dehani aur mujawwaza tanzeem-e-nau se mutaliq bayanat ki wazahat ko qarar diya gaya hai.