Duki: District Explosive Committee ka ijlas, do koyla companiyon ke licenses ki tajdeed ka jaiza

Duki: Deputy Commissioner Duki Fazal ur Rehman Kabdani ki zer-e-sadarat District Explosive Committee ka aham ijlas manaqid hua, jis mein zila mein explosive se mutaliq umoor, do koyla companiyon ke licenses ki tajdeed, security maamlaat aur qanooni taqazon ka tafseeli jaiza liya gaya.

Ijlas mein Commander 87 Wing Colonel Shahid Bilal, Superintendent of Police Duki Younis Raza, Assistant Commissioner Duki Muhammad Akram Harifal, Assistant Commissioner Thal Chotiali Abdul Salam Shahwani, Assistant Commissioner Loni Fateh Khan Bangulzai, mutaliqa intelligence idaron ke numainDon, incharge CTD, Special Branch, Inspector of Mines aur deegar afsaran ne shirkat ki.

Ijlas mein dono companiyon ke explosive licenses ki tajdeed ke cases par mutaliqa mehkamon ki reports, security clearance, qanooni taqazon aur hifazati iqdamaat par ghaur kiya gaya.

Qawaid ki mukammal pabandi ki hidayat

Deputy Commissioner ne hidayat ki ke licenses ki tajdeed aur deegar maamlaat tamam qanooni o intizami taqazay mukammal hone ke baad hi qawaid o zawabit ke mutabiq nimtaye jayen. Unhon ne kaha ke explosive se mutaliq maamlaat mein ghaflat ya ghair zaroori takheer qabil-e-qubool nahin, jabke awam aur Kan Kani ke shobe se wabasta afrad ki jaan o maal ka tahaffuz har soorat yaqeeni banaya jaye.

Unhon ne explosive ke istemal, zakheera aur naql o hamal se mutaliq hifazati o qanooni zawabit par sakhti se amal-dar-amad aur mehkamon ke darmiyan moassir rabita kari par zor diya taake qawaid ki khilaf warzi ka tadaruk ho sake. Un ka kehna tha ke zila Duki mein Kan Kani ke shobe ki ahmiyat ke pesh-e-nazar mehfooz aur qanooni Kan Kani ka farogh, hifazati miyar ki behtari aur qawaneen par moassir amal-dar-amad intizamia ki tarjeehat mein shamil hai.

Ijlas ke ikhtitam par afsaran ko hidayat ki gayi ke explosive se mutaliq tamam cases mein qawaid o zawabit, security taqazon aur qanooni tariqa-e-kaar ki mukammal pabandi karte hue reports aur zaroori karrawai barwaqt mukammal karen.

Tasveer: Bashukriya DGPR Balochistan