District Police Quetta mein 349 jawanon ki bharti mukammal, 44 khawateen aur 7 aqliyati umeedwar bhi shamil

Quetta: Additional IGP o Commandant Balochistan Constabulary Ashfaq Ahmed ki sarbarahi mein qaim recruitment committee aur Deputy Commandant DIG Police Mohtarma Shehla Qureshi ki zer-e-nigrani District Police Quetta mein jawanon ki bharti ka amal shaffaf andaz mein merit ki bunyad par mukammal kar liya gaya. Bharti ke dauran tamam umeedwaron ke liye yaksan mawaqe aur muqarrara qawaid o zawabit par amalderamad yaqeeni banaya gaya.

Bharti ke nateeje mein general cadre male quota ke tahat 298, ladies quota mein 44 aur aqliyati quota ke tahat 7 jawan bharti kiye gaye, yoon mujmui taur par 349 jawan District Police Quetta ka hissa ban gaye.

Hukkam ke mutabiq poore amal mein merit, shaffafiyat aur muqarrara tareeqa-e-kar ko bunyadi ahmiyat di gayi aur umeedwaron ki ahliyat aur deegar taqazon ko madde nazar rakh kar intekhab kiya gaya. Bharti ki nigrani aala police hukkam ne ki taake kisi bhi marhale par merit aur shaffafiyat par samjhauta na ho.

Police hukkam ne kaha ke nayi bhartiyon se District Police Quetta ki afradi quwwat mein izafa hoga aur force ko mazeed munazzam, faal aur mustahkam banane mein madad milegi. Naye jawanon ki shamooliyat se Quetta shehar mein Aman o Aman ke qiyam, jaraim ki roak tham, shehriyon ke jaan o maal ke tahaffuz aur policing ke deegar faraiz ke liye dastiyab nafri barhegi.

Hukkam ke mutabiq Balochistan Police mein bhartiyon mein merit aur shaffafiyat ko bunyadi usool ke taur par barqarar rakha ja raha hai taake ahl,ba-salahiyat aur mustahiq naujawanon ko police force mein khidmat anjaam dene ke mawaqe milen.

Tasveer: Bashukriya DGPR Balochistan