Deputy Commissioner Sherani Kaleemullah Kakar ka Rural Health Center Manikhwah ka achanak daura

Sherani: Deputy Commissioner Sherani Kaleemullah Kakar ne Rural Health Center (RHC) Manikhwah ka achanak daura kiya aur mukhtalif shobon ka tafseeli muaina karte hue tibbi sahuliyat, adwiyat ki dastyabi, safai suthrai aur tibbi amle ki karkardagi ka jaiza liya.

Daure mein unhon ne wards, OPD aur emergency samet deegar shobe dekhe, zer-e-ilaaj mareezon aur un ke lawahiqeen se mulaqat kar ke sahuliyat ke baare mein maloomat hasil kin aur mareezon o awam ke masail sun kar un ke fori izale ke liye hidayat jaari kin.

Deputy Commissioner ne amle ki hazri aur zimmedariyon ka jaiza lete hue hidayat ki ke doctors, paramedical staff aur deegar amla duties baqaidagi se anjam dein taake door daraz ilaqon se aane wale mareezon ko barwaqt aur miyari sahuliyat muyassar hon.

Unhon ne kaha ke bunyadi markaz-e-sehat aur Rural Health Centers dehi awam ko Sehat ki bunyadi sahuliyat faraham karne mein kaleedi kirdar ada karte hain aur hukumat ki tarjih hai ke awam ko un ki dehleez par miyari ilaaj mile. Unhon ne safai ka miyar behtar banane, zaroori adwiyat ki dastyabi yaqeeni banane aur mareezon se khush akhlaqi se pesh aane ki hidayat ki aur kaha ke zilai intizamia mahkama-e-Sehat ke sath mil kar behtri ke iqdamat jaari rakhegi.

Tasveer: Bashukriya DGPR Balochistan