Deputy Commissioner Kech Yasir Iqbal Dashti ka bottle band pani ke karkhana malikan se CSR ke tahat falahi taawun ka mutalba

Turbat: Deputy Commissioner Kech Yasir Iqbal Dashti ki zer-e-sadarat bottle band pani ke karkhanon ke malikan ka aham ijlas munaqid hua, jis mein Assistant Commissioner Turbat, Assistant Commissioner Buleda aur karkhanon ke malikan ne shirkat ki. Ijlas mein awami sahuliyat ki behtari, corporate samaji zimmedari (CSR) ke tahat falahi iqdamat, awami mufad ke mansubon aur zilai intizamia ke sath niji shobe ke taawun par tabadla-e-khayal kiya gaya.

Deputy Commissioner ne kaha ke niji shoba muashre ki taraqqi aur awami falah-o-bahbood mein aham kirdar ada kar sakta hai. Unhon ne karkhana malikan par zor diya ke woh CSR ke tahat zilai intizamia se bharpoor taawun karein aur ambulance ki marammat-o-bahali, mustahiq aur honhar nawjawanon ke liye scholarships aur deegar falahi iqdamat mein hissa lein, jis se mustahiq afrad ko fori relief aur muashre mein musbat sargarmiyon ko farogh milega.

Unhon ne kaha ke zilai intizamia awami masail ke hal aur bunyadi sahuliyat ki farahmi ke liye tamam dastiyab wasail baroe kar la rahi hai, aur intizamia-o-niji shobe ke bahmi taawun se awami khidmat ko mazeed muassir banaya ja sakta hai. Ijlas ke ikhtitam par karkhana malikan ne zilai intizamia se bharpoor taawun ke azm ka izhar kiya.

Tasveer: Bashukriya DGPR Balochistan