Deputy Commissioner Kech se wufood ki mulaqat: Pak-Iran border ki bandish aur Abser Inter College ke masail uthaye gaye

Turbat: Deputy Commissioner Kech Yasir Iqbal Dashti se zila Kech ke mukhtalif wufood ne mulaqat ki, jis mein awam ko darpesh mukhtalif awami o ijtimai masail par tafseeli tabadla-e-khayal kiya gaya.

Mulaqat mein Municipal Corporation Turbat ke Chief Officer Shoaib Nasir, PDMA ke Deputy Director Malik Rehan Dashti, Anjuman-e-Tajiran Kech ke sadr Nisar Ahmed Joskey, Ijaz Ahmed Joskey, Ishaq Roshan, Abdul Rehman Sangar, Zareef Zadag, thekedar Zubair, Kohda Noor, Fazal Karim, Gulzar Dost, Seth Yasin, Jamal Shakeel, Ehsan aur digar maujood the.

Wufood ne Deputy Commissioner ko Aman o Aman ki surat-e-haal, Pak-Iran border ki bandish, BSDI mansoobe aur digar awami masail se agah kiya aur Abser Inter College ki talibaat ke liye bus samet digar zaroori sahuliyat ka mutalba kiya.

Deputy Commissioner Yasir Iqbal Dashti ne kaha ke zila intezamia awami masail ke hal ke liye bharpoor iqdamat kar rahi hai aur Aman o Aman ki behtari ke liye mutalliqa idaron ke sath murabbat hikmat-e-amali ke tahat kaam jari hai. Pak-Iran sarhad se mutalliq muamlat ke hal aur sarhadi sargarmiyon ki bahali ke liye mutalliqa hukkam se rabta jari hai aur border jald kholne ke liye iqdamat kiye ja rahe hain.

Unhon ne yaqeen dahani karai ke Abser Inter College ke liye chhe kamron ki tameer aur zaroori furniture ki faraahmi ko BSDI program mein shamil karne ke liye iqdamat kiye jayenge, aur kaha ke awami falah, taleemi sahuliyat ki behtari aur ilaqe ki taraqqi ke liye dastiyab wasail moassir andaz mein istemal kiye ja rahe hain.

Tasveer: Bashukriya DGPR Balochistan