Deputy Commissioner Kalat Ayesha Zehri ka Government Girls Higher Secondary School Kalat ka daura, masail hal karne ki yaqeen dahani

Kalat: Deputy Commissioner Kalat Engineer Ayesha Zehri ne District Education Officer Nisar Ahmed Noorzai ke hamrah Government Girls Higher Secondary School Kalat ka daura kiya, jahan Head Mistress Yasmeen Shahwani ne unhein school mein dastiyab taleemi sahuliyat, darpesh masail aur deegar umoor ke hawale se tafseeli briefing di.

Is mauqe par Deputy Commissioner ne school ke khasta haal kamron ka muaina bhi kiya. Unhon ne school mein qayam mahakma taleem ke book store ka bhi jaiza liya aur wahan maujood sahuliyat ka muaina kiya.

Deputy Commissioner ne school ke khasta haal kamron ki marammat, book store ki tauseeh aur talibat ki taleemi zaruriyat ko madde nazar rakhte hue naye kamron ki tameer ke liye thos iqdamat uthane ki yaqeen dahani karayi.

Engineer Ayesha Zehri ne kaha ke taleem ke shobe mein behtari lana aur taleemi idaron ko darpesh masail ka hal zilai intizamia ki tarjeehat mein shamil hai. Unhon ne kaha ke talibat ko behtar taleemi mahaul aur zaroori sahuliyat ki faraahmi ke liye zilai intizamia aur mahakma taleem bahami taawun se iqdamat kar rahe hain, taake taleemi idaron mein tadreesi amal ko mazeed mauassir banaya ja sake.