Deputy Commissioner Chaman ki zair-e-sadarat ijlas: BSDI phase three aur shehar ke tarqiyati kamon ka jaiza

Chaman: Deputy Commissioner Chaman Habib Ahmed Bangulzai ki zair-e-sadarat DC office Chaman mein District Coordination Committee (DCC) ka mahana karkardagi ijlas munaqid hua, jis mein zila ke civil o fauji afsaran aur mukhtalif mahkamon ke numainDon ne shirkat ki.

Ijlas mein sarkari idaron ki karkardagi, tafweez kardah tasks, jari tarqiyati mansoobon aur awami falahi umoor ka tafseeli jaiza liya gaya. Taleemi idaron, mahkama Sehat, municipal services, sarkon ki tameer o bahali, BSDI phase three ke tahat jari tarqiyati kamon aur Chaman shehar ki tazeen o araish aur safai suthrai ke iqdamat par afsaran ne briefing di.

Deputy Commissioner ne kaha ke tamam idaron ke darmiyan bahami rabta, taawun aur hum ahangi zaroori hai take awami masail barwaqt hal hon. Unhon ne hidayat ki ke jari mansoobon ki muassir nigrani ki jaye, miyari material istemal kiya jaye aur mansoobe muqarrarah muddat mein mukammal kiye jayen.

Unhon ne taleemi idaron, Sehat ki sahuliyat, municipal services, safai suthrai aur shehri tarqi se mutaliq umoor par khusoosi tawajjuh dene ki hidayat bhi ki take jari mansoobon ke samarat barah-e-raast awam tak pahunchen.

Tasveer: Bashukriya DGPR Balochistan