DC Complex Harnai mein Youm-e-Difa ki taqreeb, Additional Deputy Commissioner Muhammad Saleem Tareen ki sadarat

Harnai: Youm-e-Difa Pakistan ke mauqe par DC Complex Harnai mein purwaqar taqreeb munaqid hui jis ki sadarat Additional Deputy Commissioner (General) Harnai Muhammad Saleem Tareen ne ki. Taqreeb mein mukhtalif makatib-e-fikr ke afrad, police afsaran o ahalkaron, qabaili o siyasi rahnumaon aur civil society ne badi tadad mein shirkat ki.

Taqreeb mein 1965 ki jang ke shuhada ki qurbaniyon aur security forces ki shujaat ko khiraj-e-tahseen pesh kiya gaya. Muhammad Saleem Tareen ne kaha ke 6 September qaumi tareekh ka darakhshan din hai jab afwaj aur qaum ne mil kar dushman ke azaim khak mein mila diye, aur watan ke difa, Aman o Aman aur salamati ke liye shuhada ki qurbaniyan mash’al-e-rah hain jinhein kabhi faramosh nahin kiya ja sakta.

Taqreeb ke dauran District Police Harnai ne sakht aur foolproof security intezamat kiye aur police ki bhaari nafri hassas points par taenaat rahi. Ikhtitam par mulk o qaum ki salamati, taraqqi aur shuhada ke darjaat ki bulandi ke liye duayen mangi gayin.

Tasveer: Bashukriya DGPR Balochistan