Dam mein Balochistan ke pehle tijarati jheenga farming mansoobe ke muahide par dastakhat, Chief Minister Balochistan ki maujoodgi

Quetta: Hukumat-e-Balochistan aur House of Kasab Consortium ke mabain Dam mein Balochistan ke pehle tijarati jheenga farming mansoobe ke qiyam ke liye muahide par dastakhat ho gaye. Balochistan Board of Investment and Trade ki kaawishon se tai pane wale is muahide ko soobe mein nijji sarmaya kari, sahili maeeshat ke farogh aur muqami abadi ke liye rozgar ke naye mawaqe paida karne ki janib aham pesh raft qarar diya ja raha hai.

Chief Minister Balochistan Mir Sarfraz Bugti ki maujoodgi mein House of Kasab Consortium ke Chief Executive Saad Zahid aur Secretary Mahkama Mahi Geeri Tariq Qamar ne muahide par dastakhat kiye. Taqreeb mein Chief Secretary Balochistan Shakeel Qadir Khan aur Balochistan Board of Investment and Trade ke Vice Chairman Bilawal Khan Kakar bhi maujood the.

Chief Minister ka izhar-e-khayal

Chief Minister Mir Sarfraz Bugti ne kaha ke Balochistan mein sarmaya kari ke farogh, qudrati wasail ke mooassir istemal aur maeeshati sargarmiyon mein izafe ke liye hukumat public private partnership ke tehat mansoobon ko aage barha rahi hai. Dam mein soobe ke pehle tijarati jheenga farming mansoobe ka qiyam isi silsile ki aik aham kari hai, jis se sahili wasail ko barue kaar lane aur muqami maeeshat ko mustahkam karne ke naye mawaqe paida honge.

Unhon ne kaha ke Balochistan ki wasee sahili patti maeeshi taraqqi, abi zaraat aur baraamadat ke farogh ke liye numayan imkanat rakhti hai. Zaroorat is amr ki hai ke in wasail ko jadeed tareeqon, nijji sarmaya kari aur mooassir hikmat-e-amli ke zariye paidawari sargarmiyon mein tabdeel kiya jaye. Jheenga farming ka mansooba is hawale se ahmiyat rakhta hai ke is se na sirf aik nayi tijarati sargarmi mutaarif hogi balkeh mustaqbil mein is shobe ko wusat dene ke imkanat bhi paida honge.

Mir Sarfraz Bugti ne kaha ke soobe ki maeeshi taraqqi ka amal isi waqt mooassir sabit ho sakta hai jab is ke samarat muqami abadi tak pahunchein. Dam ke mansoobe mein 100 fisad mulazmatein muqami afrad ko faraham karne ka azm is hawale se aham hai. Is se sahili ilaqon ke logon ko rozgar ke mawaqe maisar aayenge aur muqami abadi ki maeeshati sargarmiyon mein shamooliyat barhe gi.

Unhon ne kaha ke Hukumat-e-Balochistan aise iqdamat ki hausla afzai karti hai jo muqami wasail ko istemal karte hue rozgar, sarmaya kari aur paidawari salahiyat mein izafa karen.

Mansoobe ki tafseelat

Hukkam ke mutabiq mansoobe ke tehat nijji shobah ek arab 11 crore rupay ki sarmaya kari kare ga. Ibtidai marhale mein 50 acre arazi par tijarati jheenga farm qaim kiya jaye ga, jabkeh mustaqbil mein ise 100 acre ya is se zaid raqbe tak tausee dene ki gunjaish bhi maujood hai. Mansoobe ke zariye baraamadi miyar ke jheengon ki paidawar ko farogh dene aur Balochistan mein abi zaraat ke shobe ko taraqqi dene ka hadaf rakha gaya hai.

Hukumat-e-Balochistan mansoobe ke liye 7 crore 50 lakh rupay maliyat ki zameen aur 40 crore rupay maliyat ki bijli ki sahulat faraham kare gi, jis ke tehat hukumati moawanat ki majmooi maliyat 47 crore 50 lakh rupay banti hai. Mansoobe mein Hukumat-e-Balochistan ka majmooi equity hissa 20 fisad hoga, jis mein musabiqati boli ke zariye hasil kardah 10 fisad muft equity aur zameen o bijli ki sahulat ke awaz 10 fisad ada shuda equity shamil hai.

Mansoobe ki 20 sala operational muddat ke dauran Hukumat-e-Balochistan ko 86 crore 60 lakh rupay munafa hasil hone ki tawaqqo hai. Is ki majmooi riayati muddat 21 saal 6 maah muqarrar ki gayi hai, jis mein maaliyati umoor ki takmeel ke liye chhe maah, tameraat ke liye aik saal aur operation o dekh bhal ke liye 20 saal shamil hain. Riayati muddat mukammal hone par mansooba aur is ke tamam asasay Hukumat-e-Balochistan ko muntaqil kar diye jayenge.

Balochistan Board of Investment and Trade ke Vice Chairman Bilawal Khan Kakar ne kaha ke Dam mein jheenga farming ka mansooba soobe ki maeeshat ke liye aham sabit hoga. Unhon ne is tawaqqo ka izhar kiya ke mansoobe se sarmaya kari ko farogh mile ga, muqami afrad ke liye rozgar ke mawaqe paida honge aur sahili wasail se maeeshi fawaid hasil karne mein madad mile gi.

Tasveer: Bashukriya DGPR Balochistan