CPEC Joint Working Group baraye Gwadar ka nawan ijlas: Pak-China Friendship Hospital 300 bistaron tak barhane ki tajweez zer-e-ghaur

Islamabad: Pak-China iqtisadi rahdari (CPEC) ke tehat Gwadar ki tarraqi se mutalliq Joint Working Group (JWG) ka nawan ijlas Beijing aur Islamabad mein munaqid hua, jis mein Gwadar mein jari, mukammal aur mustaqbil ke tarraqiyati mansoobon ki pesh raft, tarjihat aur aayinda laeha-e-amal ka tafseeli jaiza liya gaya.

Ijlas ki mushtarka sadarat Pakistan ki jaanib se secretary wazarat-e-mansoobabandi, tarraqi o khusoosi iqdamat Dr Muhammad Tahir Noor aur China ki jaanib se National Development and Reform Commission (NDRC) ke director general Mr Pan Jiang ne ki. Mutalliqa wafaqi wazaraton, idaron aur Chini hukkam o maahireen ne shirkat ki, jabke director general Gwadar Development Authority Moin-ur-Rehman Khan aur director general operations Gwadar Port Authority Daud Kalmati video link ke zariye shareek hue. Islamabad mein Chini sifaratkhane ke commercial wing ke aala hukkam bhi ijlas mein mojood the.

Pakistani aur Chini hukkam ne apne apne shobon aur mansoobon par briefing di aur Gwadar mein CPEC ke tehat mukammal, zer-e-tameer aur mujawwaza mansoobon ki pesh raft ka jaiza liya gaya. Pak-China Technical and Vocational Institute (PCTVI), GDA Pak-China Friendship Hospital aur 1.2 million gallon yomiya (MGD) samandari pani ke desalination plant ki pesh raft aur ifadiyat bhi zer-e-ghaur aayi.

Chini hukkam ka itminan, taawun jari rakhne ka azm

Chini hukkam ne Gwadar mein mukammal kiye gaye samaji o maashi mansoobon ki karkardagi aur un se muqami abadi ko barah-e-raast milne wale fawaid par itminan ka izhar kiya aur khushi zahir ki ke Technical and Vocational Institute, Friendship Hospital aur 1.2 MGD desalination plant samet China ke taawun se mukammal mansoobe shehriyon ko amali sahulyaat de rahe hain. Unhon ne azm zahir kiya ke Gwadar ki samaji o maashi tarraqi ke liye China ka taawun jari rahega aur muqami zarooriyat ko madde-nazar rakhte hue naye mansoobon par bhi ghaur hota rahega.

GDA ki nai tajaweez

Ijlas mein GDA ki mustaqbil ki tajaweez par ghaur kiya gaya, jin mein Pak-China Friendship Hospital ki tawseea aur is ki istedad aik sau se 300 bistaron tak barhana, medical aur nursing college ka qayam aur Sehat o Taleem ke shobon se mutalliq deegar tajaweez shamil thin. West Bay/Padi Zir mein jadeed fish landing jetty, fish harbour aur boat making industry ke qayam ki tajaweez bhi zer-e-ghaur aayin, jin ka maqsad mahigiri ko jadeed sahulyaat dena, mahigiron ke liye rozgar o Karobar ke naye mawaqe paida karna aur muqami maeeshat ko mustahkam karna hai. Gwadar Smart Environment Sanitation System and Landfill Project ki tajweez bhi shamil ki gayi.

Ijlas mein Gwadar Port aur free zone, East Bay Expressway Phase-II, breakwater ki tameer, berthing areas aur channels ki dredging, bandargah ki mulki iqtisadi marakiz se rabita kari, aur M8 motorway o mineral corridor se Gwadar tak rabita sarkon samet mutaadid mansoobon ki pesh raft ka jaiza bhi liya gaya.

Gwadar Port Authority ne bandargah ki maujooda operational surat-e-haal, Gwadar Free Zone Phase-I aur Phase-II aur mustaqbil ki zarooriyat par briefing di. Ijlas mein Gwadar Port ke zariye cargo aur America Iran jang ke tanazur mein transit tijarat barhane, free zone mein sarmaya kari ke farogh aur sanati sargarmiyon ko wusat dene ke iqdamat par bhi baat hui.

Is amr par zor diya gaya ke CPEC ke tehat Gwadar ki tarraqi ko sirf bandargah aur tijarat tak mehdood rakhne ke bajaye Sehat, Taleem, pani, rozgar, shehri sahulyaat aur muqami maashi sargarmiyon se murabbit kiya jaye taake awam ko barah-e-raast samraat milen. Mujawwaza naye mansoobon par mazeed ghaur aur mutalliqa forums se un ki baqaida manzoori ke liye iqdamat par ittifaq hua, aur azm zahir kiya gaya ke baahmi mushawarat se Gwadar ko jadeed bandargahi, shehri aur maashi markaz banane ka amal mazeed tez kiya jayega.

Tasveer: bashukriya DGPR Balochistan