Commissioner Sevi Asadullah Faiz ki zer-e-sadarat Polio Task Force ijlas, zero dose bachon ki nishandehi ka hukum

Sevi: Commissioner Sevi Division Asadullah Faiz ki zer-e-sadarat divisional task force bara-e-Polio ka ijlas munaqid hua, jis mein Deputy Commissioner Sevi Major (r) Ilyas Kakazai, Divisional Director Health, Divisional Polio Officer Dr Ashraf aur DHO Sevi Dr Qadir Haroon samet afsaran shareek hue, jabke Division ke deegar Azla ke Deputy Commissioners, DHOs aur DM PPHI video link se shamil hue.

Ijlas mein Polio muhim ki tayyariyon, micro planning, zero dose bachon ki nishandehi, post campaign validation aur teamon ki tainati ka jaiza liya gaya. Commissioner ne micro census ka amal mukammal karne, zero dose bachon ki nishandehi aur post campaign validation ko moassir banane ki hidayat ki, aur kaha ke zila satah par tamam tainatiyan DOC ke zariye hongi aur tamam Azla zameeni haqaiq ke mutabiq micro plan tayyar karein.

Commissioner ne Sehat-e-amma ke liye sewerage ke nizam par khusoosi tawajjo dene par zor dete hue kaha ke sewerage ka masla hal kiye baghair Sehat-e-amma ke deegar masail par qaboo pana mushkil hai. Ijlas mein Polio ke mukammal khatme ke liye zila o divisional satah par marboot hikmat-e-amali jari rakhne par ittefaq kiya gaya.

Tasveer: Bashukriya DGPR Balochistan