Commissioner Lasbela Saira Ata ka taarufi ijlas: tarqiati mansoobon ki mahana pesh raft li jaye gi, ghair hazri bardasht nahin

Uthal: Commissioner Lasbela Division Mohtarma Saira Ata ki zer-e-sadarat zila Lasbela ke sarkari mehkamon ka taarufi ijlas munaqid hua, jis mein Additional Deputy Commissioner Siraj Karim Baloch, tamam sarkari mehkamon ke afsaran aur K-Electric management ke zimmedaran shareek hue.

Deputy Commissioner Humaira Baloch ne zila mein BSDI ke tehat jari tarqiati mansoobon, mehkamon ki pesh raft aur CSR ke tehat Sailab se mutasira schoolon ki bahali ke liye intizamia ki koshishon se agah kiya. Unhon ne bataya ke zila ke tamam schoolon ke liye furniture aur solarization ka mansooba BSDI ke tehat shuru kiya gaya hai, tamam shelter-less schoolon ke liye imaraten tameer ki ja rahi hain, education sector ko khusoosi tarjih di ja rahi hai aur tamam band school operational ho chuke hain.

Unhon ne bataya ke District Coordination Committee Aman o Aman barqarar rakhne ke liye kaam kar rahi hai, jabke District Rent Assessment Committee aur District Compensation Committee faal hain.

Har scheme ka muayena hoga

Commissioner ne Deputy Commissioner ki kawishon ko saraha aur kaha ke pehli taarufi meeting mein tarqiati schemon ke zer-e-iltawa rehne aur mehkamana umoor par District Heads aur mutaliqa afsaran ke darmiyan coordination ki kami mehsoos ki gayi hai. Unhon ne hidayat ki ke afsaran tarqiati mansoobon ki physical progress mukammal karwayen, mahana pesh raft li jaye gi aur har scheme ka muayena kiya jaye ga taake Lasbela Division ke log tabdeeli mehsoos kar saken.

Commissioner ne wazeh kiya ke afsaran ko service delivery karna hogi, Commissioner office unki moawanat ke liye hamesha khula rahe ga, aur kisi bhi mehkamay ke afsar ki jaye taenaati se ghair hazri ya kotahi bardasht nahin ki jaye gi. Unhon ne hidayat ki ke aisi schemen murattab ki jayen jin se community mustafid ho, aur kaha ke Chief Secretary ki wazeh hidayat hain ke tarqiati mansoobe ijtimai mufad mein banaye jayen.

Commissioner ne tamam afsaran se fard-an fard-an unke mehkamon ke manzoor shuda tarqiati mansoobon ki physical o financial progress aur majmooi karkardagi, aur mehkama khazana ke afsar se mulazimin ke service umoor ke bare mein agahi hasil ki. Unhon ne Hingol ki sahili patti par marine life ke tahaffuz ke liye gajja net aur trawlers ki rok tham ki moasir hikmat-e-amli apnane aur coordination committee ke qiyam ke ehkamat bhi jari kiye taake chhoti machhliyon aur jheengon ki nasl kashi rokne ka mechanism banaya ja sake.

Tasveer: Bashukriya DGPR Balochistan