Commissioner Koh-e-Sulaiman Mujeeb ur Rehman Qambrani ka Rakhni mein Model Bazaar aur Rakhni ta Barkhan Road ka mooayna

Barkhan/Rakhni: Chief Minister Balochistan Mir Sarfraz Bugti ki hidayat aur taraqqiyati vision ke tehat Commissioner Koh-e-Sulaiman Division Mujeeb ur Rehman Qambrani ne Rakhni mein zer-e-tameer Model Bazaar, Adalat Road, Main Road se Samad Khan Gali aur bypass samet mukhtalif maqamat ka daura kar ke jari taraqqiyati kamon ka tafseeli mooayna kiya.

Is moqe par Additional Commissioner Abdul Basit Bizdar, Deputy Commissioner Barkhan Saeed Kakar, Superintending Engineer Communication and Works Muhammad Razzaq, Project Director Muhammad Zafar Khosa, XEN B&R Fazal Muhammad Zarkoon, Assistant Commissioner Rakhni Fahad Hussain Umrani aur deegar mutalliqa afsaran bhi mojood the.

Commissioner ne mutalliqa afsaran ko hidayat ki ke tamam jari taraqqiyati mansoobon par kaam ki raftar mazeed tez ki jaye aur tameerati kaam muqarrara muddat ke andar matlooba miyar ke mutabiq mukammal kiye jayen. Unhon ne wazeh kiya ke tameerati miyar par kisi qism ka samjhota nahin kiya jaye ga aur sarkon, nikasi-e-aab aur shehri infrastructure ki behtari par khusoosi tawajjoh di jaye.

Baad azan Commissioner Koh-e-Sulaiman Division ne zer-e-tameer Rakhni ta Barkhan Road ka bhi mooayna kiya. Project Director Muhammad Zafar Khosa ne mansoobe ki mujmui pesh raft, jari tameerati sargarmiyon aur takmeel ke muqarrara ahdaf ke baare mein tafseeli briefing di.

Tasveer: Bashukriya DGPR Balochistan