Chief Minister Sarfraz Bugti ka tabadla hone wale DIG Headquarters Hassan Asad Alvi ke liye Letter of Appreciation ka elan

Quetta: Chief Minister Balochistan Mir Sarfraz Bugti ne Balochistan se tabadla hone wale senior police officer aur DIG Headquarters Hassan Asad Alvi ki khidmaat ko sarahte hue un ke liye Letter of Appreciation ka elan kiya hai.

Jumma ko Balochistan Police Digital Initiatives ki iftitahi taqreeb ke mauqe par Chief Minister ne Police Service of Pakistan ke senior officer Hassan Asad Alvi ki karkardagi ki tareef ki aur kaha ke Balochistan mein tainati ke dauran unhon ne apni peshawarana zimmedariyan intehai ahsan andaz mein anjam dein aur police ke nizam mein behtari, jadeed Technology ke farogh aur idara jati istedad-e-kaar barhane mein namayan kirdar ada kiya.

Chief Minister ne kaha ke Hassan Asad Alvi aik qabil, mehnati aur peshawar officer hain jinhon ne Balochistan Police mein jadidiyat aur digitalization ke amal ko aage barhaya. Un ki khidmaat qabil-e-tehseen hain, isi liye hukumat Balochistan un ki khidmaat ke aitraf mein unhein Letter of Appreciation degi. Chief Minister ne un ke liye nek khwahishaat ka izhar karte hue umeed zahir ki ke woh mustaqbil mein bhi apni salahiyaton aur tajurbe se mulk o qaum ki khidmat jari rakhein ge.

Tasveer: Bashukriya DGPR Balochistan