Barkhan: PPHI ki “Sehat Dehleez” app se ghar baithe online tibbi mashwara mumkin, District Manager Ghulam Rasool

Barkhan: Wazir-e-aala Balochistan Mir Sarfraz Bugti ke vision ke tahat awam ko sehat ki sahuliyat ki aasan aur mouassar faraahmi ke liye Peoples Primary Healthcare Initiative (PPHI) Balochistan ki jaanib se mutaaruf karayi gayi mobile application “Sehat Dehleez” ke zariye shehri ghar baithe online tibbi mashwara hasil kar sakte hain.

District Manager PPHI Barkhan Ghulam Rasool ne apne bayan mein kaha ke is application ka bunyadi maqsad awam, bil-khusoos dehi aur door daraaz ilaqon mein rehne wale afraad ke liye tibbi sahuliyat tak rasai aasan banana hai.

App ke zariye shehri video call par doctor se tibbi mashwara hasil karne aur sehat se mutaalliq apna record mehfooz rakhne jaisi sahuliyat se faida utha sakte hain.

Unhon ne kaha ke Sehat Dehleez app digital sehat ki sahuliyat ke farogh ki jaanib ek aham qadam hai, jis se zila Barkhan ke shehriyon ko tibbi masail ki soorat mein ibtidai rehnumayi hasil karne mein madad mil sakti hai. Is sahulat ke zariye awam ko ghar baithe tibbi mashware ki faraahmi aur sehat se mutaalliq aagahi ko farogh dene ki koshish ki ja rahi hai.

District Manager Ghulam Rasool ne shehriyon se appeal ki ke woh Sehat Dehleez app se istifada karein aur app ke istemaal se mutaalliq rehnumayi ke liye darj zail number par rabta karein.

Rabta aur download

App download karne ka link: https://play.google.com/store/apps/details?id=org.pphib.sehatdehleez

Rabta bara-e-rehnumayi: 0333-7111770 (WhatsApp / call)

Hukumat-e-Balochistan ka azm: Awam ko sehat ki behtar sahuliyat, har dehleez tak.