Barkhan: PPHI ki app ‘Sehat Dehleez’ se ghar baithe online tibbi mashware ki sahulat

Barkhan: Peoples Primary Healthcare Institute (PPHI) Balochistan ki jaanib se mutaarif karayi gayi mobile application “Sehat Dehleez” ke zariye shehriyon ko ghar baithe online tibbi mashwara hasil karne ki sahulat faraham ki ja rahi hai.

District Manager PPHI Barkhan Ghulam Rasool ne kaha ke is app ka maqsad awam, bil-khusoos dehi aur door daraz ilaqon mein rehne wale afraad ke liye sehat ki sahuliyat tak rasai aasan banana hai. App ke zariye shehri video call par doctor se tibbi mashwara hasil karne aur sehat se mutaliq apna record mehfooz rakhne jaisi sahuliyat se faida utha sakte hain.

Unhon ne kaha ke Sehat Dehleez app zila Barkhan ke shehriyon ke liye ek mufid sahulat hai, jis ke zariye tibbi masail ki soorat mein ibtidai rehnumai ghar baithe hasil ki ja sakti hai. Is iqdam se digital sehat ki sahuliyat ko farogh dene aur awam ko tibbi rehnumai ki faraham mein madad milegi.

App download aur rabta

Sehat Dehleez app download karne ke liye link: https://play.google.com/store/apps/details?id=org.pphib.sehatdehleez

App ke istemal aur mazeed rehnumai ke liye District Manager PPHI Barkhan, Ghulam Rasool se WhatsApp / call: 0333-7111770 par rabta kiya ja sakta hai.

PPHI Balochistan — sehat ki sahuliyat awam ki dehleez par.

Tasveer: bashukriya DGPR Balochistan