Barkhan: Deputy Commissioner Saeed ur Rehman Kakar ka sarkari daftar ka achanak daura, mutaddid daftar mein amla ghair hazir

Barkhan: Deputy Commissioner Barkhan Saeed ur Rehman Kakar ne zila ke mukhtalif sarkari daftar ka achanak daura kiya, jis mein Irrigation office, B&R Road office, B&R Building office, mahkama Taleem male o female aur PHE office shamil the.

Deputy Commissioner ne afsaran o ahlkaron ki hazri, daftari nazm o zabt aur sarkari umoor ki anjam dehi ka jaiza liya. Mutaddid daftar mein amla duty se ghair hazir paya gaya, jis par unhon ne sakht barhami ka izhar kiya aur mutalliqa afsaran se wazahat talab ki.

Unhon ne hidayat ki ke tamam sarkari mulazimin muqarrara auqat-e-kaar mein duty par maujood rahein, aur wazeh kiya ke ghaflat, ghair hazri aur nazm o zabt ki khilaf warzi bardasht nahin ki jaye gi. Unhon ne hazri register aur deegar daftari umoor ka jaiza le kar hazri ka nizam muassir banane ki hidayat bhi ki.

Mahkama Taleem ke female office mein amla maujood paya gaya, jis par Deputy Commissioner ne itminan ka izhar kiya. Unhon ne kaha ke sarkari daftar ki nigrani aur achanak muaynon ka silsila jari rahe ga.

Tasveer: Bashukriya DGPR Balochistan