Balochistan Punjab aamad-o-raft sahal banane ke liye Commissioner Koh-e-Sulaiman aur Commissioner Dera Ghazi Khan ka bain-ul-sooba ijlas

Dera Ghazi Khan: Chief Minister Balochistan Mir Sarfraz Bugti ki hidayat par Commissioner Koh-e-Sulaiman Division Rakhni Mujeeb-ur-Rehman Qambrani ne Commissioner Dera Ghazi Khan Division ke saath bain-ul-sooba rabita ijlas mun’aqid kiya, jis mein Balochistan aur Punjab ke darmiyan aamad-o-raft ko mazeed sahal, mehfooz aur munazzam banane, transporters ki mushkilat ke fori izale, traffic ki rawani, security aur hangami imdadi khidmat ke mu’assir nizam par ghaur kiya gaya.

Ijlas mein Balochistan se Punjab jane wali maal bardar gaadiyon ki mukhtalif checking points par baar baar checking se hone wali takheer ka jaiza liya gaya. Shurka ne zor diya ke security par samjhauta kiye baghair checking ka amal bahami rabita kari se mazeed marboot aur sahal banaya jaye taake musafiron aur karobari tabqe ko ghair zaroori mushkilat na hon.

Sakhi Sarwar ke checking points par traffic ke barhte dabao par bhi baat hui aur mu’assir traffic management, checking ke nizam mein behtari aur musafiron o transporters ki sahulat ke liye intizami iqdamat par ittefaq kiya gaya. Dera Ghazi Khan aur Rakhni ke darmiyan mozoon maqamat par Rescue 1122 ke units ke qiyam ki tajweez bhi zer-e-ghaur aayi taake bain-ul-sooba shahrah par hadse ya tibbi hangami soorat-e-haal mein barwaqt imdad mil sake.

Mushtarka rabita committee bane gi

Ijlas mein usooli tor par faisla kiya gaya ke tamam muta’alliqa mehkamon aur idaron par mushtamil mushtarka rabita committee tashkeel di jaye gi, jo bain-ul-sooba aamad-o-raft, transporters ke masail, security, traffic aur hangami khidmat ke mustaqil hal ke liye sifarishat murattab kare gi aur muttafiqa faislon par amal-darmad ki nigrani kare gi. Committee ki bazabta tashkeel aur notification ke liye sifarishat soobai hukumat ke zariye muta’alliqa hukkam ko irsal ki jayen gi.

Ijlas mein ittefaq kiya gaya ke Balochistan aur Punjab ke darmiyan is aham route par awam, musafiron aur transporters ko mehfooz, aasan aur bila rukawat safri sahuliyat ki faraahmi ke liye idaron ke darmiyan amali rabita mazeed mazboot banaya jaye ga. Is mauqe par Additional Commissioner Koh-e-Sulaiman Division Abdul Basit Bazdar bhi mojood the.

Tasveer: Bashukriya DG PR Balochistan