Bahawalpur: NA-168 zimni intikhab keliye polling jari, 20 umeedwar maidan mein

Election Commission hukkam ke mutabiq polling ka aghaz muqarrara waqt ke mutabiq subah 8 baje shuru ho chuka hai jo ke sham 5 baje tak bila ta’attul jari rahegi.

Hukkam ka kehna hai ke NA-168 mein 4 lakh 83 hazar 143 voters apna haq-e-raye dehi istemal karenge, halqe mein 2 lakh 48 hazar 529 mard voters aur 2 lakh 34 hazar 614 khawateen voters registered hain, NA-168 mein majmooi taur par 292 polling stations qayam kiye gaye hain, jin mein se 130 mard aur 130 khawateen polling stations hain.

Halqe mein 32 mushtarka polling stations bhi qayam kiye gaye hain, NA-168 mein 896 polling booth qayam hain.

Zimni intikhab keliye security ke sakht intezamat, 3 hazar se zaid police ahalkar tainat honge, Pak Army aur Rangers ki aik aik company bhi reserve mein mojood rahegi.

Yaad rahe ke PML-N ke Malik Muhammad Iqbal Channar ke intiqal ke baais NA-168 ki nishast khali hui thi, PML-N ke Malik Munir Iqbal Channar apne walid ki khali nishast par umeedwar hain, sabiq wafaqi wazir Chaudhry Tariq Bashir Cheema ke bete Wali Dad Cheema bhi azad umeedwar ke taur par maidan mein hain.