Assistant Commissioner Usta Muhammad Maria Shamoon ka Carpet Center ka daura, machinery aur sahuliyat ka jaiza

Usta Muhammad: Deputy Commissioner Usta Muhammad Muhammad Ramzan Palal ki hidayat par Assistant Commissioner Maria Shamoon ne Carpet Center Usta Muhammad ka tafseeli daura kiya aur center ke intizami o amali umoor, kaam ke mahaul, dastiyab machinery, sahuliyat, amle ki karkardagi aur bunyadi dhanche ka jaiza liya.

Unhon ne center ke mukhtalif hisson mein jari sargarmiyon aur carpet sazi ke amal ka mushahida kiya aur zimmedaran se idare ki maujooda soorat-e-haal, darpesh masail, zaruriyat aur kaam ko mazeed mowassar banane ke iqdamat ke bare mein maloomat hasil kin.

Maria Shamoon ne kaha ke Carpet Center jaise idare hunarmand afraad ko salahiyatein barooe kaar lane, rawayati dastkari ko farogh dene aur muqami satah par rozgar ke mawaqe paida karne mein aham kirdar ada karte hain. Daure ka maqsad center ki karkardagi behtar banana, wasail ka mowassar istemal aur jahan zaroori ho sahuliyat ki behtri ke liye iqdamat tajweez karna hai.

Unhon ne amle ko safai suthrai, machinery ki munasib dekh bhal, sahuliyat ke mowassar istemal aur kaam ke behtar mahaul ko yaqeeni banane ki hidayat ki. Unhon ne kaha ke zilai intizamia hunarmandi ke farogh aur rozgar paida karne wale idaron ki behtri ke liye har mumkin taawun karegi, aur center ki behtri se muqami hunarmandon ki hausla afzai ke sath ilaqe ki rawayati dastkari ko bhi farogh milega.

Tasveer: Bashukriya DGPR Balochistan