Assistant Commissioner Buleda ka Kor-e-Pusht aur Koshk ke sarkari schools ka daura, asatiza ki hazri check

Turbat: Deputy Commissioner Kech Yasir Iqbal Dashti ki khusoosi hidayat par Assistant Commissioner Buleda Abubakar Merwani ne Buleda ke mukhtalif sarkari taleemi idaron ka tafseeli daura kiya aur tadrisi o intezami umoor ka jaiza liya.

Unhon ne Government Boys Primary School Kor-e-Pusht, Government Girls High School Kor-e-Pusht, Government Boys Primary School Koshk aur Government Boys High School Koshk ka daura kiya, jahan asatiza aur amle ki hazri, talba ki taleemi sargarmiyon, tadrisi amal, bunyadi sahuliyat aur mujmui intezami umoor ka jaiza liya aur taleemi miyar mazeed behtar banane par zor diya.

Assistant Commissioner ne schools mein peene ke saaf pani, bijli aur deegar bunyadi sahuliyat ki dastiyabi ka jaiza lete hue mutaliqa hukkam ko masail ke hal ke liye fori aur muassir iqdamat ki hidayat ki. Unhon ne asatiza par zor diya ke woh eemandari aur mehnat se zimmedariyan anjam dein aur kaha ke Taleem ke shobe mein ghaflat bardasht nahin ki jaye gi jabke asatiza ki hazri aur schools ki karkardagi ki musalsal nigrani jari rahe gi.

Unhon ne kaha ke Deputy Commissioner Kech ki hidayat ke mutabiq zila bhar mein sarkari taleemi idaron ki karkardagi behtar banane ke liye amali iqdamat jari hain aur zilai intezamia Kech Taleem ke farogh aur schools mein bunyadi sahuliyat ki behtari ko awwaleen tarjeeh de rahi hai.

Tasveer: Bashukriya DG PR Balochistan