Additional Commissioner Koh-e-Sulaiman Division Abdul Basit Bizdar ka N-70 Bawata ta Dada Haji zer-e-tameer sarak ka daura

Barkhan: Commissioner Koh-e-Sulaiman Division Mujeeb ur Rehman Qambrani ki hidayat par Additional Commissioner Koh-e-Sulaiman Division Abdul Basit Bizdar ne N-70 Bawata ta Dada Haji zer-e-tameer sarak ka daura kiya aur jari tameeraati kaam ka jaiza liya.

Is mauqe par XEN Roads Fazal Muhammad Zarkoon, PS Commissioner Koh-e-Sulaiman Division Haji Habib Khan aur deegar mutaliqa afsaran bhi un ke hamrah the. Daure ke dauran sarak ki tameeraati pesh raft ka jaiza liya gaya. Is mansoobe ka maqsad ilaqe mein amad-o-raft ko behtar banana, awam ko mehfooz safari sahuliyat faraham karna aur muqami abadi ko behtar muwasalati rabton ki sahulat dena hai.

Chief Minister Balochistan Mir Sarfraz Bugti ke vision “Khushhal Balochistan” ke tehat soobe mein miyari sarkon ki tameer aur awam ko mehfooz safari sahuliyat ki faraahmi ke liye amali iqdamat jari hain. Hukumat-e-Balochistan awami mufad ke taraqqiyati mansoobon ki bar waqt takmeel aur tameeraati kamon mein miyar ko yaqeeni banane ke liye pur azm hai.

Tasveer: Bashukriya DG PR Balochistan