Murree mein school van hadsay ka shikar, 10 bachay jhulas kar zakhmi

Hadsay ki ittila milte hi Rescue 1122 ki qareebi emergency teams fori taur par jaye waqua par pahunch gayin.

Rescue hukkam ke mutabiq Rescue ahalkaron ne barwaqt karwai karte hue gaari mein siwar bachon ko behifazat bahar nikala aur zakhmi bachon ko mauqe par ibtidai tibbi imdad faraham ki, tamam zakhmi bachon ko mazeed tibbi imdad ke liye Civil Hospital Murree muntaqil kar diya gaya.

Dusri janib Rescue 1122 ki fire fighting team ne gaari mein lagi aag par qaboo pa liya, jabke jaye waqua par cooling ka amal bhi mukammal kiya gaya.

Wazir-e-aala Punjab Maryam Nawaz Sharif ne Murree mein van hadsay mein talba ke jhulas kar zakhmi hone par dukh aur afsos ka izhar kiya aur report talab kar li.

Maryam Nawaz Sharif ne ibtidai report mein overloading aur atishzadgi se bachao ke liye hifazati intizamat na hone ka notice lete hue school van mein hifazati intizamat aur fitness par zero tolerance apnane ka hukm de diya.

Unhon ne kaha ke school van safety ke bare mein wazeh ahkamat ke bawajood amal daramad na hona afsosnak aur taklif deh amr hai, commissioner Rawalpindi zakhmi bachon ke ilaj ki khud nigrani karenge